وزیرکھیل وثقافت کاجسٹس ریٹائرڈناصر الملک کے بطور نگران وزیر اعظم کے تقرری پر اظہارمسرت

جسٹس ریٹائرڈناصر الملک سوات دھرتی کے قابل فخر سپوت ہیں جنہوں نے پہلے پشاور ہائیکورٹ اور بعد ازاں سپریم کورٹ کے چیف جسٹس کی حیثیت سے عدلیہ میں شاندارخدمات کی بدولت قوم کے سامنے اہل سوات کا سر بھی فخر سے بلند کیا

پیر 28 مئی 2018 20:24

پشاور(اُردو پوائنٹ اخبارتازہ ترین - این این آئی۔ 28 مئی2018ء) خیبرپختونخوا کے وزیر آبپاشی وکھیل و پاکستان تحریک انصاف ملاکنڈ ڈویثرن کے صدر محمود خان ،وزیر اعلیٰ کے مشیر برائے لائیوسٹاک محب اللہ خان اور چیئرمین ڈیڈ ک وپی ٹی آئی سوات کے ضلعی صدر فضل حکیم خان نے جسٹس ریٹائرڈناصر الملک کے بطور نگران وزیر اعظم تقرر پر مسرت کاا ظہارکرتے ہوئے اس فیصلے کا تہہ دل سے خیر مقدم کیا ہے ایک مشترکہ بیان میں انہوں نے کہا کہ جسٹس ریٹائرڈناصر الملک سوات دھرتی کے قابل فخر سپوت ہیں جنہوں نے پہلے پشاور ہائیکورٹ اور بعد ازاں سپریم کورٹ کے چیف جسٹس کی حیثیت سے عدلیہ میں شاندارخدمات کی بدولت قوم کے سامنے اہل سوات کا سر بھی فخر سے بلند کیاانہوں نے امید ظاہر کی کہ وہ نگران وزیر اعظم کی حیثیت سے بھی عمدہ کارکردگی کا مظاہرہ کریں گے جبکہ ہم سمیت تمام اہل سوات کی دعائیں ہمیشہ انکے ساتھ رہیں گی اور آئندہ بھی نت نئی کامیابیاں ان کا مقدر بنیںگی۔