پاکستان گلگت بلتستان آرڈر 2018 پر بھارت کا احتجاج مسترد کر دیا

بھارتی ڈپٹی ہائی کمشنر جے پی سنگھ کو دفترخارجہ طلب کرکے احتجاج ریکارڈ کرایا

پیر 28 مئی 2018 22:40

اسلام آباد(اُردو پوائنٹ اخبارتازہ ترین - این این آئی۔ 28 مئی2018ء) پاکستان نے گلگت بلتستان آرڈر 2018 پر بھارت کا احتجاج مسترد کرتے ہوئے بھارتی ڈپٹی ہائی کمشنر جے پی سنگھ کو دفترخارجہ طلب کرکے احتجاج ریکارڈ کرایا۔ترجمان دفتر خارجہ ڈاکٹر فیصل کی جانب سے جاری ہونے والے بیان کے مطابق پاکستان نے بھارت کی جانب سے گلگت بلتستان آرڈر پر احتجاج اور مقبوضہ جموں و کشمیر پر دعویٰ کو مسترد کردیا ہے اور بیان میں کہا کہ بھارت من گھڑت احتجاج کے بجائے مقبوضہ وادی سے غیر قانونی تسلط ختم کرے۔

(جاری ہے)

ترجمان نے کہا کہ مقبوضہ کشمیر پر بھارتی دعویٰ کسی طور پر قابل قبول نہیں اور گلگت بلتستان آرڈر پر بھارتی احتجاج کو بھی مسترد کرتے ہیں، پاکستان نے جو اقدام اٹھایا ہے وہ گلگت بلتستان کے عوام کو مزید بااختیار بنانے کے لیے ہے۔ڈی جی جنوبی ایشیا و سارک ڈاکٹر فیصل نے بھارتی ڈپٹی ہائی کمشنرجے پی سنگھ کو دفترخارجہ طلب کرکے شدید احتجاج کیا اور بھارتی ڈپٹی ہائی کمشنر کو احتجاجی مراسلہ حوالے کیا، جس میں کہا گیا ہے کہ پاکستان گلگت بلتستان آرڈر 2018پر بھارت کے بیان کو سختی سے مسترد کر تا ہے جبکہ بھارت کا مقبوضہ جموں و کشمیر پر دعویٰ جھوٹا اور بے بنیاد ہے۔