پاکستان مسلم لیگ (ن) حکومت کی وجہ سے آج پاکستان دنیا کی ساتویں ایٹمی طاقت کے طور پر انتہائی اہم پوزیشن کا حامل ہے ،ْچوہدری محمد مسعو د خالد

منگل 29 مئی 2018 15:32

مظفر آباد(اُردو پوائنٹ اخبارتازہ ترین - این این آئی۔ 29 مئی2018ء) آزاد کشمیر کے وزیر سول ڈیفنس چوہدری محمد مسعود خالد نے میڈیا کے نمائندوں سے گفتگو کے دوران کہا ہے کہ پاکستان مسلم لیگ (ن) کی حکومت نے ملکی دفاع کو ناقابل تسخیر بنا دیا ہے اورآج پاکستان دنیا ئے اسلام کی پہلی اور دنیا کی ساتویں ایٹمی طاقت کے طور پر انتہائی اہم پوزیشن کا حامل ہے ۔

اس موقع پر انہوں نے مزید کہا کہ مسلم لیگ ن کی وفاقی حکومت کی موثر حکمت عملی کی بدولت ملک معاشی طور پر آج مضبوط ٹریک پر آچکا ہے ۔

(جاری ہے)

آزاد کشمیر کے ترقیاتی بجٹ کو دگنا کرنے کے بھی ملکی معیشت پر دور رس نتائج مرتب ہوں گے اور آزاد خطہ میں تعمیر وترقی کے عمل کو تیز کرنے کے علاوہ عوام الناس کو خوشحالی بھی میسر آئے گی ۔ چوہدری محمد مسعود خالد نے مجوزہ آئینی مسودہ کو آزاد خطہ کے لیے سود مند قرار دیتے ہوئے کہا کہ ریاستی ایکٹ اب عبوری آئین کہلائے گا۔ کشمیر کونسل کے اختیارات کی واپسی کے بعد اب اسکی حیثیت ایڈوائزری ہوگی ۔ کشمیر کونسل کے اثاثہ جات ، جائیدادیں و فنڈز اب آزاد حکومت کی تحویل میں آ جائیں گے اورانکم ٹیکس آزادکشمیر حکومت وصول کرے گی ۔