ضلعی امن کمیٹی و یوم شہادت حضرت علی ؓکے حوالے سے اجلاس

منگل مئی 22:12

لاہور۔29 مئی(اُردو پوائنٹ اخبارتازہ ترین۔ 29 مئی2018ء) ڈپٹی کمشنر لاہور سمیر احمد سید کی زیر صدارت گذشتہ روز ضلعی امن کمیٹی و یوم شہادت حضرت علی ؓکے حوالے سے ایک اہم اجلاس ڈی سی آفس نادر ہا ل میں ہوا، اجلاس میں توقیر حسین بابا، سید جعفر علی شاہ، امیر حسین، پیر سید محمد عثمان نوری، ذوالفقار حیدر نقوی و دیگر علماء نے شرکت کی، اجلا س میں یوم شہادت حضرت علیؓ کے موقع پر 21 رمضان المبارک کو نکلنے والے جلوس کے انتظامات کا جائزہ لیا گیا، ڈی سی لاہور نے اے سی(سٹی) عبداللہ خرم نیازی اور ایس پی (سٹی) کو لائسنس ہولڈر کے ساتھ ملکر روٹ کا دورہ کرنے کی ہدایت کی، اس موقع پر ڈی سی لاہور نے کہا کہ 21رمضان المبارک کو یو م شہادت حضرت علیؓ کے جلوس کے موقع پر سکیورٹی کے مناسب انتظامات کئے جائیں گے، انہوں نے کہا کہ پولیس اہلکاروں کے ساتھ سول ڈیفنس اور سکائوٹس ڈیوٹیاں سرانجام دیں گے، انہوں نے کہا کہ جلوس کے روٹ پر سی سی ٹی وی کیمرے لگائے جائیں گے اور کنٹرول روم بنایا جائیگا، ڈی سی لاہور سمیراحمد سیدنے افسران کو ہدایت کی کہ جلوس کے روٹ پر پیچ ورک کا کام مکمل کیا جائے اور لائٹنگ کا بھی مناسب انتظام کیا جائے، انہوں نے کہا کہ جلوس کے روٹ سے تجاوزات کو ختم کیا جائے اور لٹکتی تاروں کوہٹایا جائے، پارکنگ کیلئے مناسب انتظامات کئے جائیں، انہوں نے کہا کہ جلوس کے روٹ پر عارضی ہسپتال بھی قائم کیئے جائیں گے، اجلاس میں علمائے کرام اور شیعہ حضرات نے امن کے پرچارکو یقینی بنانے کے عزم کا اظہار کیا اور ڈی سی لاہور سمیر احمد سید کو وزیر اعلیٰ کی طرف سے ایوارڈ ملنے پر مبارک باد پیش کی۔