کراچی میں سورج سوا نیزے پر آگیا،

کراچی(اُردو پوائنٹ اخبارتازہ ترین - آن لائن۔ 30 مئی2018ء) کراچی میں سورج سوا نیزے پر آگیا۔شدید گرمی سے شہری بے حال ہوگئے۔محکمہ موسمیات نے جمعرات تک گرمی کی لہر برقرار رہنے کی پیشن گوئی کی ہے۔تفصیلات کے مطابق کراچی موسم کی حدت میں مزید اضافہ ہوگیا ہے جبکہ سورج آگ برسا رہا ہے بدھ کے روز شہر میں گرمی کاراج رہا اور درجہ حرارت 46 ڈگری سینٹی گریڈ ریکارڈ کیا گیا جبکہ سمندری ہوائیں بند ہونے کی وجہ سے گرمی کی شدت 49 ڈگری سینٹی گریڈ تک محسوس کی گئی۔

ہوا میں نمی کا تناسب 7 سے 10 فیصد تک رہا۔شہر کے مختلف علاقوں میں گرمی کی شدت سے اکثر لوگ بے ہوش ہوگئے جنہیں قریبی اسپتالوں میں منتقل کر کے ابتدائی طبی امداد دی گئی۔جبکہ سرکاری اسپتال میں ہیٹ ویو کے باعث ایمرجنسی نافذ تھی اس کے علاوہ شہر کے مختلف علاقوں اور شاہراہوں پر رینجرز، پولیس اور شہری انتظامیہ کی جانب سے کیمپ بھی لگائے گئے جہاں شہریوں کیلئے ٹھنڈے پانی کا انتظام کیا گیا تھا۔

(جاری ہے)

اور ان کیمپوں پر گرمی سے متاثرہ شہریوں کو ابتدائی طبی امداد بھی دی گئی۔دوسری جانب محکمہ موسمیات نے شہریوں کو خبردار کیا ہے کہ گرمی کہ شدت جمعرات تک برقرار رہے گی اس دوران دھوپ میں نکلنے سے گریز کریں۔محکمہ۔موسمیات کا کہنا ہے کہ جمعے سے سمندری ہوائیں چلنا شروع ہوجائیں گی جس سے گرمی کا زورٹوٹے گا۔جبکہ اس دوران شہری محتاط رہیں۔علاوہ ازیں سخت گرمی اور ماہ صیام کے باعث معمولات زندگی شدید متاثر رہے اور دن کے اوقات میں کراچی کی سڑکیں سنسان رہیں اور ٹریفک نہ ہونے کے برابر رہی۔پبلک ٹرانسپورٹ بسیں اکا دکا ہی سڑکوں پر آئیں۔عوام کی اکثریت نے دن کے اوقات میں گھروں سے باہر نکلنے سے گریز کیا۔دوپہر میں کاروبارزندگی مفلوج رہاہے۔