جنوبی پنجاب اراضی ریکارڈ سنٹرز میں 193نئی بھرتیوں کااعلان

بدھ مئی 19:28

ملتان۔30 مئی(اُردو پوائنٹ اخبارتازہ ترین۔ 30 مئی2018ء) پنجاب لینڈ ریکارڈز اتھارٹی نے سروس سنٹر آفیشلز کی 702نئی بھرتیوں کا اعلان کر دیا ہے۔تمام بھرتیاں پنجاب پبلک سروس کمشن کے ذریعے کی جائیں گی اورسروس سنٹر آفیشلز کو پنجاب کے 36اضلاع میں واقع 152اراضی ریکارڈسنٹرز میں تعینات کیا جائے گا۔ان تعیناتیوں کے بعد تمام اراضی ریکارڈسنٹرز پہ رش میں واضح کمی آئے گی اور خدمات کی بروقت فراہمی ممکن بنائی جاسکے گی۔

اس حوالے سے جاری کی گئی تفصیلات کے مطابق جنوبی پنجاب کے تینوں ڈویژن جن میں ملتان ڈویژن میں66، بہاولپور78اور ڈیرہ غازیخان میں49سروس سنٹرآفیشلز بھرتی کیے جائیں گے۔جنوبی پنجاب کے ان ڈویژن میں خواتین کے کوٹہ میں 19اقلیتی کوٹہ میں9اور معذور افراد کے لیے 5آسامیاں مختص کی گئی ہیں۔

(جاری ہے)

تفصیلات کے مطابق سروس سنٹرآفیشلز کو تین سالہ معاہدہ کے تحت بھرتی کیا جائے گااور ماہانہ تنخواہ تیس ہزار روپے مقرر کی گئی ہے۔

درخواست دہندہ کی تعلیمی قابلیت گریجوایشن ، ٹائپنگ سپیڈ 40الفاظ فی منٹ اور 6ماہ کی آئی ٹی تربیت تجربے کا حصہ ہو۔کمپیوٹر کی بنیادی جانکاری رکھنے والے درخواست دہندگان کو اہمیت دی جائے گی۔عمر کی حد 20سے 35سال مقرر کی گئی ہے۔امیدواران کا 100نمبر کا تحریری امتحان لیا جائے گا جس میں جنرل نالج ،مطالعہ پاکستان ، حالات حاضرہ ، اسلامیات، جیوگرافی،ریاضی ، انگلش ، اردو ، روزمرہ سائنس اور کمپیوٹر کی تعلیم سے متعلق بنیادی معروضی سوالات شامل ہیں۔۔پنجاب پبلک سروس کمیشن کے مطابق درخواستیں جمع کرانے کی آخری تاریخ 14جون 2018مقرر کی گئی ہے۔