جب تک مردم شماری کے اصل نتائج سامنے نہیں آتے حلقہ بندی نہ کی جائے،فیصل سبزواری

اگر درخواست نہ مانی گئی تو عدالت میں جائیں گے،میڈیا سے گفتگو

بدھ 30 مئی 2018 21:34

کراچی (اُردو پوائنٹ اخبارتازہ ترین - آئی این پی۔ 30 مئی2018ء) ایم کیو ایم پاکستان (بہادر آباد) کے رکن رابطہ کمیٹی فیصل سبزواری نے کہاہے کہ الیکشن کمیشن میں درخواست کی ہے کہ جب تک مردم شماری کے اصل نتائج سامنے نہیں آتے حلقہ بندی نہ کی جائے۔ اگر درخواست نہ مانی گئی تو عدالت میں جائیں گے۔

(جاری ہے)

فیصل سبزواری اور عامر خان نے الیکشن کمیشن کے دفتر میں میڈیا سے گفتگو کرتے ہوئے کہاکہ مشترکہ مفادات کی کونسل نے طے کیا تھا کہ مردم شماری کے نتائج کا اعلان اس وقت تک نہیں ہوگا جب تک 5 فیصد رہائشی بلاک کا تھرڈ پارٹی آڈٹ نہ ہو شفاف اور غیر جانبدارانہ انتخابات کرانا الیکشن کمیشن کی ذمہ داری ہے جبکہ مردم شماری میں حلقہ بندی قابل اعتراض ہے اورانتخابات جس مردم شماری کی بنیاد پر ہونگے وہ بھی قابل اعتراض ہی ہونگے، انھوں نے کہاکہ اسلام آباد میں حلقہ بندیوں کو کالعدم قرار دیدیا لیکن یہاں ایسی ایسی یونین کونسلز بنی ہیں کہ انکے حوالے سے کچھ نہیں کہا جاسکتا، انھوں نے کہاکہ پتنگ کا نشان ایم کیو ایم پاکستان کے پاس ہے پارٹی کا سربراہ کون ہوگا عدالت نے فیصلہ محفوظ کر رکھا ہے جو جلد سب کو معلوم ہوجائے گا۔