پی ٹی آئی کے نامزد ناصردرانی کی نگراں وزیراعلیٰ بننے سے معذرت

تاہم اب ناصر درانی کی معذرت کے بعد تحریک انصاف کو ایک بار پھر نئے ناموں کی تلاش کرنا ہوگی۔ کیونکہ دو نام پارلیمانی کمیٹی یا الیکشن کمیشن کو دیے جائیں گے۔ واضح رہے تحریک انصاف نے اس سے قبل نگراں وزیراعلیٰ پنجاب کیلئے ناصر محمود کھوسہ کا نام دیا تھا۔ جس پر وزیراعلیٰ پنجاب شہباز شریف اور اپوزیشن لیڈر خورشید شاہ کے درمیان اتفاق کے بعد باقاعدہ پریس کانفرنس کے دوران اس نام کو پبلک کردیا گیا۔

تاہم پی ٹی آئی کے مطابق انہیں سوشل میڈیا پر ناصر محمود کھوسہ کا نام نامزدکرنے پر شدید تنقید کا سامنا رہا ہے۔ جس پرتحریک انصاف ناصر کھوسہ کے نام کو واپس لینے پر مجبور ہوئی۔ چیئرمین پی ٹی آئی عمران خان کی زیرصدارت اجلاس میں طے پایا کہ ناصر کھوسہ کا نام واپس لیا جائے۔ بعدازاں اپوزیشن لیڈر میاں محمود الرشید نے اپنے ہی نامزد کردہ نگران وزیراعلیٰ ناصر کھوسہ کے نام کو واپس لینے کا اعلان کردیا۔

دوسری جانب آج الیکشن کمیشن آفس کے باہر وزیرقانون پنجاب رانا ثناء اللہ نےمیڈیا سے گفتگو میں کہا کہ تحریک انصاف نے انتہائی غیرسنجیدہ رویہ اپنایا ہے۔نگراں وزیراعلیٰ کے نام پر یوٹرن لے لیا۔اس طرح کبھی نہیں ہوا کہ اتفاق کے بعد فیصلہ واپس لیا جائے۔وزیراعلیٰ پنجاب اور اپوزیشن لیڈر میں نگراں وزیراعلیٰ کیلئے تین دن مشاورت کی گئی۔

آئین کے مطابق ناصر کھوسہ کا نام طے کیا گیا ہے۔پھر ناصر کھوسہ کے نام پرپروپیگنڈا کیا گیا۔اب انہوں نے کنفیوژن پیدا کردی ہے۔انہوں نے کہا کہ پی ٹی آئی نے اب دو نام اور دیے ہیں ۔ ان کے اوپرغور کیا جائے گا۔کیونکہ ناصر کھوسہ کیلئے گورنرآج رات تک آئینی و قانونی طور پر نوٹیفکیشن جاری کرسکتے ہیں۔اگر وہ نہیں نوٹیفکیشن جاری نہیں کرتے تو پھر دیکھا جائے گا کہ اب نام پارلیمانی کمیٹی میں جائے گا یا الیکشن کمیشن کے پاس جائے گا۔کیونکہ آج رات تک مشاورت ہوسکتی تھی۔اس موقع پرزاہد حامد نے کہا کہ حلقہ بندیوں سے متعلق درخواستیں ذاتی حیثیت میں ہیں۔