ایل آرایچ میں رمضان اور دل کی بیماریوں کی روک تھام سے متعلقہ آگاہی پیدا کرنے کیلئے سیمینار

جمعرات 31 مئی 2018 18:19

پشاور۔ (اُردو پوائنٹ اخبارتازہ ترین - اے پی پی۔ 31 مئی2018ء) لیڈی ریڈنگ ہسپتال پشاور میں رمضان اور دل کی بیماریوں کی روک تھام سے متعلقہ آگاہی پیدا کرنے کیلئے سیمینارکا انعقاد کیا گیا، جس کا اہتمام ہسپتال کے پریوینٹیو کارڈیالوجی ڈیپارٹمنٹ نے کیا ،سیمینار میںڈاکٹروں، مریضوں اور ان کے لواحقین نے بھی شرکت کی، ڈائریکٹر پریونیٹیو کارڈیالوجی ڈاکٹر شازیہ نے خاص طور پر رمضان میں دل کی صحت کے حوالے سے مختلف پہلوئوں پر روشنی ڈالی، انہوں نے کہا کہ امراض قلب سے بچنا آسان ہے اگر ہم اپنی طرز زندگی میں تبدیلی لائیں ، ڈاکٹر شازیہ نے کہا کہ ورزش کو معمول بنانے کیساتھ ساتھ وزن کو کنٹرول میں رکھنا دل کی بیماریوں سے بچاتاہے، ڈاکٹر آصف ،ڈائٹیشن مس غزالہ اور سائیکوتھراپسٹ مس عائشہ نے اس موقع پر مریضوں کی رہنمائی کرتے ہوئے کہا کہ احتیاط علاج سے بہتر ہے اور دل کی بہت سی بیماریاں ایسی ہیں جن سے احتیاط سے بچاجاسکتا ہے، متوازن غذا، ورزش، کھانے پینے کی عادات بہتربنانا اور تمباکو نوشی سے پرہیز سے دل کی صحت پر مثبت اثرات مرتب ہوتے ہیں، سیمینار میں دل کی بیماریوں اور علاج سے متعلق سوال جواب کا سیشن بھی ہواجس سے ان کو معلومات حاصل ہوئیں۔