سپریم کورٹ نے سیکرٹری قانون پنجاب ابوالحسن نجمی کو ذاتی حیثیت میں طلب کر لیا

جمعہ جون 18:24

لاہور۔یکم جون(اُردو پوائنٹ اخبارتازہ ترین۔ 01 جون2018ء) سپریم کورٹ نے سیکرٹری قانون پنجاب کو عہدے سے ہٹانے کی درخواست پرابولحسن نجمی کو ذاتی حیثیت میں طلب کر لیا۔۔چیف جسٹس آف پاکستان مسٹر جسٹس میاں ثاقب نثار کی سربراہی میں دو رکنی بنچ نے درخواست پر سماعت کی۔

(جاری ہے)

دوران سماعت درخواست گزار وکیل میاں ظفر اقبال کلانوری نے کہا کہ ریٹائرڈ سیکرٹری اسمبلی ابولحسن نجمی کومیرٹ اور قوانین کے برعکس لاء سیکرٹری قانون پنجاب لگایا گیا،پچھتر سالہ ابولحسن نجمی کو تین بار غیر قانونی طور پرسیکرٹری قانون کے عہدے پر توسیع دی گئی،انہوں نے کہاکہ قوانین اورعدالتی فیصلے کے تحت تریسٹھ برس سے زائد عمر کے شخص کو عہدے پر تعینات نہیں کیا جا سکتا لیکن اس کے باوجود ابولحسن نجمی کو سیکرٹری قانون پنجاب مقرر کر دیا. درخواست گزار نے دعویٰ کیا کہ سیکرٹری قانون پنجاب نے اپنے فرائض سے غفلت کی جس کی وجہ سے ثالثی اور مصالحتی بل بننے کے باوجود اسے منظوری کے لئے اسمبلی میں نہیں بھجوایا گیا،انہوں نے کہا کہ شہریوں کو جان بوجھ کر سستے اور فوری انصاف سے دور رکھا گیا اس لیے سیکرٹری قانون پنجاب کو عہدے سے ہٹایا جائے جس پر عدالت نے سیکرٹری قانون پنجاب ابوالحسن نجمی کو عدالت میں ذاتی حیثیت میں طلب کر لیا۔