ایل پی جی کی قیمتوں میں اضافہ فورا واپس لیا جائے : فاروق افتخار

لاہور (اُردو پوائنٹ اخبارتازہ ترین - آن لائن۔ 02 جون2018ء) ایل پی جی ایسوسی ایشن آف پاکستان نے حکومت سے مطالبہ کیا ہے کہ وہ ایل پی جی کی قیمتوں میں حالیہ اضافہ فورا واپس لے کیونکہ اس کی وجہ سے یہ فیول عام آدمی کی پہنچ سے باہر ہوگیا ہے۔ ایسوسی ایشن کے ایک ہنگامی اجلاس سے خطاب کرتے ہوئے ایل پی جی ایسوسی ایشن آف پاکستان کے چیئرمین فاروق افتخار نے کہا کہ غیرمعیاری اور خطرناک ایل پی جی کی وسیع پیمانے اور سمگلنگ کی وجہ سے مقامی ایل پی جی انڈسٹری پہلے ہی تباہی کے دہانے پر ہے جبکہ ایل پی جی کی قیمتوں میں اضافے سے صورتحال مزید خراب ہوگی۔

فاروق افتخار نے کہا کہ موجودہ پالیسیاں ایل پی جی کی درآمد اور سمگلنگ کی حوصلہ افزائی کررہی ہیں جس کی وجہ سے نہ صرف مقامی ایل پی جی پروڈیوسرز بلکہ قومی خزانے کو بھاری نقصان پہنچ رہا ہے۔

(جاری ہے)

انہوں نے کہا کہ انتہائی گھٹیا معیار کی خطرناک ایل پی جی سستے داموں فروخت ہورہی ہے جس کی قیمت بہترین معیار کی مقامی ایل پی جی کی نسبت بیس فیصد تک کم ہے، اس کی وجہ سے انسانی صحت اور ماحولیات پر انتہائی بٴْرے اثرات مرتب ہورہے ہیں۔

انہوں نے کہا کہ اس صورتحال کی وجہ سے مقامی ایل پی جی مارکیٹنگ کمپنیوں کو بھاری نقصان کا سامنا ہے اور منافع تو ایک طرف انہیںاپنی بنیادی کاسٹ بھی وصول نہیں ہوپارہی ہے۔ فاروق افتخار نے کہا کہ اس وقت 155ایل پی جی کمپنیاں مارکیٹنگ کمپنیاں پاکستان میں کام کررہی ہیں، مارکیٹنگ کمپنیوں کو جو کوٹہ الاٹ کیا گیا ہے وہ انہیں ہر حال میں اٹھانا پڑتا ہے خواہ انہیں جتنا بھی نقصان ہو۔انہوں انہوں نے کہا کہ اگر مقامی ایل پی جی انڈسٹری کو بچانے کے لیے اقدامات نہ اٹھائے گئے تو یہ بالکل تباہ ہوجائے گی جس کا نتیجہ بڑے پیمانے پر بے روزگاری اور حکومتی آمدن میں کمی کی صورت میں برآمد ہوگا۔