رواں ماہ جون کے دوران بارشوں کی کمی ، گرم ہوائیں ، لو چلنے سے پھلدار پودوں کو شدید نقصان پہنچ سکتاہے،ماہرین زراعت

اتوار 3 جون 2018 12:30

فیصل آباد۔3 جون(اُردو پوائنٹ اخبارتازہ ترین - اے پی پی۔ 03 جون2018ء) رواں ماہ جون کے دوران بارشوں کی کمی ، گرم ہوائیں ، لو چلنے سے پھلدار پودوں کو شدید نقصان پہنچ سکتاہے لہٰذا باغبان پھلدار پودوں کی خصوصی دیکھ بھال یقینی بنائیں اور بوقت ضرورت شام کو آبپاشی بھی کریں ۔

(جاری ہے)

ماہرین زراعت نے بتایاکہ پنجاب کے میدانی اور جنوبی علاقے اس وقت شدید گرمی کی لپیٹ میں ہیں جہاں درجہ حرارت 45سی50ڈگری سینٹی گریڈ کے درمیان ہے جو پھلوں کیلئے انتہائی نقصان دہ ہے کیونکہ پھلدار پودے زیادہ سے زیادہ 45 ڈگری سینٹی گریڈ درجہ حرارت برداشت کرنے کی صلاحیت رکھتے ہیں اور اس سے زائد گرمی پر پھل جھلس جاتاہے ، اس کے چھلکے پھٹ جاتے ہیں اور اس کی کوالٹی بری طرح متاثر ہو تی ہے۔

انہوںنے اے پی پی کو بتایاکہ باغبان نرسری سے نئے پودے لاتے وقت اس بات کا خیال رکھیں کہ پیوند کی اونچائی 12 سے 15 انچ سے زائد نہ ہو ۔انہوںنے کہاکہ نئے لگائے گئے آم ، کھجور ، لیچی کے پودے گرمی سے زیادہ متاثر ہو سکتے ہیں اس لئے ان پودوں پر سائے کا مناسب بندوبست بھی ضروری ہے ۔ انہوںنے کہاکہ باغبان مزید رہنمائی کیلئے ماہرین زراعت سے بھی رابطہ کرسکتے ہیں۔