میرپور ‘ جاتلاں روڈ کے دونوں اطراف ہر قسم کی ناجائز تجاوزات ہٹانے کے لئے آپریشن کلین اپ شروع

دوران آپریشن سڑک کے دونوں اطراف ناجائز تجاوزات ،تعمیرات،تھڑے وغیرہ کو ہیوی مشنری کے ذریعے گرا دیا گیا

اتوار 3 جون 2018 14:10

میرپور(اُردو پوائنٹ اخبارتازہ ترین - این این آئی۔ 03 جون2018ء) ڈپٹی کمشنر سردار عدنان خورشید خان کی ہدایت پر افسر مال و ڈیوٹی مجسٹریٹ راجہ ایاز احمد خا ن نے جڑی کس جاتلاں روڈ کے دونوں اطراف ہر قسم کی ناجائز تجاوزات ہٹانے کے لئے آپریشن کلین اپ شروع کیا۔آپریشن سہنسہ سے لیکر جاتلاں ہیڈ تک کیا گیا ۔اپریشن کلین اپ کے دوران ان کے ہمراہ محکمہ شاہرات کے افسران اور پولیس کی بھاری تعداد موجود تھی ۔

دوران آپریشن سڑک کے دونوں اطراف ناجائز تجاوزات ،تعمیرات،تھڑے وغیرہ کو ہیوی مشنری کے ذریعے گرا دیا گیا۔آپریشن کے دوران ڈیوٹی مجسٹریٹ نے لوگوں کو ہدایت کی آئندہ کوئی شخص روڈ سائید پر کسی قسم کی تجاوزات نہیں کرئیگا اگر کسی نے کوئی تجاوزات کی تو اس کے خلاف قانون کے مطابق سخت ایکشن لیاجائے گا۔

(جاری ہے)

انہوں نے کہا کہ اگلے مرحلہ میں جاتلاں ہیڈ سے لیکر جاتلاں بازار،پل منڈا ،نہر جہلم پر چیچاں تک اپریشن کلین اپ شروع کیا جائے گا عوام الناس کو ہدایت کی جاتی ہے کہ وہ اپنی تجاوزات آپریشن کلین اپ سے قبل از خود ہٹا لیںبصورت دیگر آپریشن کے دوران ہونے والے مالی نقصانات کے وہ خود ذمہ دار ہونگے۔

آپریشن کلین اپ کا مقصد روڈ سائیڈ تجاوزات کا خاتمہ کرکے روڈ کو کشادہ کرنا ہے تاکہ ٹریفک کے نظام میں کوئی خلل پیدا نہ ہو۔