مسلم لیگ (ن) نے اقتدار میں آ کر صرف اپنا کاروبار چمکایا ہے اور قوم کا مال کھایا ہے ‘یاسمین راشد

کرپشن کے کینسر نے ملکی اداروں اور معیشت کو کھو کھلا کر دیا ہے ،بے روز گاری کی وباء بڑھنے سے غربت میں اضافہ ہوا ہے

اتوار جون 17:32

لاہور (اُردو پوائنٹ اخبارتازہ ترین۔ 03 جون2018ء) پاکستان تحریک انصاف کی سینئر مرکزی رہنما ڈاکٹر یاسمین راشد نے کہا ہے کہ پاکستان کی سیاست سے (ن) لیگ کی سیاست کا ہمیشہ ہمیشہ کیلئے باب ختم ہو چکا ہے (ن) لیگ والے بتائیں کہ انہوں نے اپنی حکومتوں کے دوران پاکستان کی عوام کے لئے کیا کچھ کیا ہے تو ان کے پاس کوئی بھی جواب نہیں ہو گا ویسے بھی سب جانتے ہیں کہ انہوں نے اقتدار میں آ کر صرف اپنا کاروبار چمکایا ہے اور قوم کا مال کھایا ۔

وہ گزشتہ رو ز این اے 125کے مرکزی آفس میں ملاقات کے لیے آئے ہوئے پارٹی رہنمائوں سے گفتگو کررہی تھی ۔ انہوںنے کہا کہ جنوبی پنجاب کی عوام کے ساتھ بھی ناروا سلوک رکھا گیا ہے پورے پنجاب کا بجٹ صرف لاہور کے ترقیاتی منصوبوں پر لگادیا جاتا ہے ، کوئی نیا ہسپتال نہیں بنایا گیا ، میگا پراجیکٹ میں ہو شربا کرپشن کی گئی اب ان سے حساب مانگا جا رہا ہے تو ان کی چیخیں نکل رہی ہے ۔

(جاری ہے)

انہو ں نے کہاکہ غربت اور مہنگائی کی وجہ سے بے حال عوام آنے والے الیکشن میں اب مسلم لیگ(ن) کو دوبارہ نہیں آزمائیں گے بلکہ انہیں اپنے ووٹ کی طاقت سے نشان عبرت بنا دیں گے حکومتی پالیسوں کی وجہ سے غربت اور مہنگائی نے عام آدمی کو بے حال کردیا ہے یہی وجہ ہے کہ اب عوام (ن) لیگ کو دوبارہ ووٹ نہیں دیں گے۔انہوںنے مزید کہاکہ کرپشن کے کینسر نے ملکی اداروں اور معیشت کو کھو کھلا کر دیا ہے جبکہ بے روز گاری کی وباء بڑھنے سے غربت میں اضافہ ہوا ہے لہٰذا بڑھتی ہوئی غربت کا علاج کرنے کیلئے کرپشن کے کینسر کو جڑ سے ختم کرنا ہوگا اس لئے نیب کو بد عنوانی کے خلاف جنگ قومی فر یضہ سمجھ کر لڑنی چاہیے۔