طلعت علی ملک 2019 ورلڈ کپ تک قومی ٹیم کی منیجر رہیں گے

طلعت علی ملک کو گذشتہ سال دورہ آسڑیلیا کے بعد وسیم باری کی جگہ قومی ٹیم کا منیجر بنایا گیا تھا

اتوار 3 جون 2018 18:10

اسلام آباد(اُردو پوائنٹ اخبارتازہ ترین - آئی این پی۔ 03 جون2018ء) طلعت علی ملک 2019 ورلڈ کپ تک قومی ٹیم کی منیجر رہیں گے۔ایک انٹرویومیں پاکستان ٹیم کے منیجر طلعت علی ملک نے بتایا کہ پاکستان کرکٹ بورڈ نے انہیں اس بات سے آگاہ کر دیا ہے کہ وہ آئندہ سال انگلینڈ میں ہونے والے 12 ویں آئی سی سی ورلڈ کپ میں پاکستان ٹیم کے منیجر ہوں گے۔۔پاکستان کیلئے 10 ٹیسٹ میچز کھیلنے والے طلعت علی کے مطابق وہ سرفراز احمد کی قیادت میں کھیلنے والی ٹیم کے ساتھ اچھا محسوس کرتے ہیں۔

انہوں نے کہا کہ سرفراز ایک متحرک کپتان ہے جس کے ساتھ لڑکے محنت جی جان سے کرتے ہیں،ایک دوسرے کا حوصلہ بڑھاتے ہیں اور دوستوں کی طرح وقت گزارتے ہیں۔طلعت علی نے کہا کہ گذشتہ سال سرفراز احمد کی قیادت میں چیمپیئنز ٹرافی جیتنا اس ٹیم کے لیے ایک ٹرننگ پوائنٹ تھا جس سے کھلاڑیوں کے اعتماد میں بے پناہ اضافہ ہوا ہے۔

(جاری ہے)

طلعت علی ملک جنہیں گذشتہ سال دورہ آسڑیلیا کے بعد وسیم باری کی جگہ قومی ٹیم کا منیجر بنایا گیا تھاکا کہنا ہے کہ انہوں نے گذشتہ ماہ 29 مئی کو اپنی 68 ویں سالگرہ منائی ہے البتہ ان کی عمر کے حوالے سے سابق کرکڑز اور ناقدین خاصی تنقید کرتے رہتے ہیں کہ وہ 70سال کے ہوگئے ہیں اور اب تک ٹیم سے جڑے ہوئے ہیں۔

طلعت علی ملک جو ماضی میں بطور آئی سی سی میچ ریفری بھی فرائض انجام دے چکے ہیں کہتے ہیں کہ پاکستان ٹیم کا منیجر رہنا ایک اعزاز کی بات ہے جب تک پی سی بی انہیں اس قابل سمجھے گا ان کی خدمات حاضر ہیں۔