کارخانو مارکیٹ سے حاجی کیمپ تک موٹرسائیکلوں کے ذریعے کپڑوں کے تھان لانے پر پابندی کیخلاف معذور افراد کا احتجاجی

پیر جون 22:03

پشاور(اُردو پوائنٹ اخبارتازہ ترین۔ 04 جون2018ء) پشاور کے معذور افراد کا حیات آباد پولیس کی جانب سے کارخانو مارکیٹ سے حاجی کیمپ تک موٹرسائیکلوں کے ذریعے کپڑوں کے تھان لانے پر پابندی کیخلاف پشاور پریس کلب کے سامنے احتجاجی کیمپ جاری ہے اور پیر کے روز احتجاج میں شدت لاتے ہوئے شیر شاہ سوری روڈکو بھی بلاک کردیا جس سے ٹریفک کا نظام معطل رہا ، ۔

کیمپ میں پشاور کے مختلف علاقوں سے معذورافراد نے شرکت کی جس کی قیادت معذورافراد کی تنظیم کے صدر نجیب خان کر رہے تھے ۔مظاہرین کا کہنا تھا کہ وہ مزدوری کرنے کے سلسلے میں موٹر سائیکل چنگ چی کے ذریعے کارخانو مارکیٹ سے حاجی کیمپ تک مختلف قسم کپڑوں کے تھا ن لاتے ہیں جس میں پانچ چھ سو تک روپے کی مزدوری ہوتی ہے لیکن تھانہ حیات آباد کے ایس ایچ او مبینہ طورپر ان افراد سے بھتہ لیتے ہیں جبکہ رقم نہ دینے کی صورت میں اب پابندی عائد کر دی گئی ہے حالانکہ بڑی گاڑیوں کے ذریعے کپڑے کے تھان باآسانی مذکورہ مقام پہنچتے ہیں کیونکہ ان گاڑیوں سے ایس ایچ اوباقاعدہ رقم وصول کرتے ہیں ۔

(جاری ہے)

معذور افراد نے آئی جی خیبر پختونخوا ، چیف جسٹس پشاور ہائیکورٹ اور دیگر متعلقہ حکام سے مطالبہ کیا کہ معذور گنڈا ماروں کو بیجا تنگ کرنے پر نوٹس لیکر اس میں انکوائری کی جائے اور ملوث پولیس حکام کو قانون کے مطابق سزادی جائے۔