اے پی ایم ایل کی کور کمیٹی کا اجلاس

پرویز مشرف کی وطن واپسی،ان پرقائم مقدمات اورپارٹی کی انتخابی مہم جیسے مختلف معاملات پر مشاورت کے بعد اہم فیصلے

پیر 4 جون 2018 23:41

اسلام آباد(اُردو پوائنٹ اخبارتازہ ترین - آن لائن۔ 04 جون2018ء) آل پاکستان مسلم لیگ کی کور کمیٹی کا اجلاس پارٹی چیئرمین پرویز مشرف کی زیرصدارت دوبئی میں منعقد ہوا۔ اجلاس میں پرویز مشرف کی وطن واپسی،ان پرقائم مقدمات اورپارٹی کی انتخابی مہم جیسے مختلف معاملات پر مشاورت کے بعد اہم فیصلے کئے گئے۔پارٹی کے جوائنٹ سیکرٹری اطلاعات شہزاد عربی ستی نے میڈیا کے لئے جاری کئے گئے ایک بیان میں کہا کہ پیر کو پرویز مشرف نے دوبئی میں اپنی رہائش گاہ پر پارٹی کی کورکمیٹی کا اہم اجلاس طلب کیاتھا جس میںپارٹی سیکرٹری جنرل ڈاکٹر محمد امجد، سید فقیر حسین بخاری،مہرین ملک آدم اور دیگر اراکین شریک ہوئے۔

اجلاس میں عام انتخابات سے قبل سید پرویز مشرف کی وطن واپسی،ان پرقائم مقدمات اور پارٹی کی انتخابی مہم جیسے معاملات پر مشاورت کے بعد اہم فیصلے کئے گئے۔

(جاری ہے)

انہوں نے کہا کہ کل(بروزمنگل) پارٹی کے پارلیمانی بورڈ کا اجلاس اسلام آباد میں پارٹی کے مرکزی دفتر میں منعقد ہوگا جس میں کور کمیٹی کے کئے گئے فیصلوں کا جائزہ لے کر انہیں عملی جامہ پہنانے کے لئے طریقہ کار وضع کیاجائے گا۔ اجلاس کے اختتام پر پارٹی سیکرٹری جنرل ڈاکٹر محمد امجد ایک پریس کانفرنس کے ذریعے سید پرویز مشرف کی وطن واپسی اور ان کے انتخابی عمل میں حصہ لینے سمیت دیگر اہم فیصلوں بارے میڈیا کے نمائندوں کو آگاہ کریں گے۔۔۔