عراقی پارلیمان کا عام انتخابات میں ڈالے گئے ووٹوں کی دوبارہ گنتی کا حکم

بغداد(اُردو پوائنٹ اخبارتازہ ترین - این این آئی۔ 07 جون2018ء) عراق کی پارلیمان نے 12 مئی کو منعقدہ پارلیمانی انتخابات میں ڈالے گئے ووٹوں کی دوبارہ ہاتھوں سے جزوی گنتی کی منظوری دی ہے اور الیکٹورل کمیشن کو منجمد کردیا ہے۔اس کی جگہ اب نو جج صاحبان پر مشتمل کمیشن گنتی کے عمل کی نگرانی کرے گا۔عرب ٹی وی کے مطابق عراقی پارلیمان کے 382 میں سے 173 ارکان نے عام انتخابات میں ڈالے گئے ووٹوں کی دوبارہ گنتی کے لیے قرارداد کے حق میں ووٹ دیا ہے۔

اس کے تحت مشین کے ذریعے ڈالے گئے 25 فی صد ووٹوں کی دوبارہ گنتی ہوگی ۔پارلیمان نے گنتی کے عمل میں بڑے پیمانے بے ضابطگیوں کی شکایات کے بعد ووٹوں کی دوبارہ گنتی کا حکم دیا ہے۔عراقی حکومت نے الیکٹورل کمیشن کے ارکان پر بیرون ملک جانے پر بھی پابندی عاید کردی ہے اور کہا ہے کہ وہ انتخابات میں فراڈ کی تحقیقات تک بیرون ملک نہیں جاسکتے ہیں۔

(جاری ہے)

پارلیمان نے حکومت کے اس فیصلے کا خیر مقدم کیا ہے اور کہا ہے کہ ان اقدامات سے نئی حکومت کی تشکیل کے عمل کو تقویت ملے گی اور ملک میں استحکام آئے گا۔پارلیمان انتخابات میں شیعہ لیڈر مقتدیٰ الصدر کی قیادت میں سائرون اتحاد نے سب سے زیادہ 54 نشستیں حاصل کی تھیں۔فتح اتحاد کے حصے میں 47 نشستیں آئی تھیں ۔اس اتحاد میں ایران نواز شیعہ ملیشیاؤں پر مشتمل الحشد الشعبی کے یونٹس شامل ہیں۔ وزیراعظم حیدر العبادی کی قیادت میں نصر اتحاد نے 42 نشستوں پر کامیابی حاصل کی تھی۔