ا سلام آباد، تھانہ کوہسار کی حدود میں25 سالہ نوجوان میٹرو بس کے نیچے آکر جاں بحق

جمعہ 8 جون 2018 21:39

اسلام آباد(اُردو پوائنٹ اخبارتازہ ترین - آن لائن۔ 08 جون2018ء) تھانہ کوہسار کی حدود میں25 سالہ نوجوان میٹرو بس کے نیچے آکر جاں بحق ہوگیا ،سیکورٹی عملہ نہ ہونے کی وجہ سے شہری نے جلد بازی میں روڈکراس کرنے کی کوشش کی جس سے حادثہ پیش آیا۔

(جاری ہے)

گزشتہ روز بلیو ایریا اسٹاک چینج کے قریب آزاد کشمیر کے رہائشی پچیس سالہ فیصل جو سعودی پاک ٹاور میں اے سی ٹیکنیشن کا کام کرتا تھا کام سے باہر گیا اور جلد بازی میں بلیو ایریا سائیڈ پر آنے کی کوشش کرتے ہوئے شارٹ کٹ اختیار کرتے ہوئے انڈر پاس کی بجائے میٹرو روڈ کراس کرنے کی کوشش کی جس سے شہری کی میٹرو بس سے ٹکر ہوگئی جسے زخمی حالت میں پمز ہسپتال منتقل کیا گیا تاہم زخموں کی تاب نہ لاتے ہوئے فیصل جاں بحق ہوگیا۔

شہریوں کے مطابق روڈ پر میٹرو بس کا سکیورٹی عملہ موجود نہیں تھااور سکیورٹی عملے کی عدم موجودگی کی وجہ سے شہری میٹرو ٹریک تک پہنچا جس سے وہ میٹرو بس کے نیچے آکر جاں بحق ہو گیا۔پولیس کے مطابق جاں بحق ہونے والے کی شناخت فیصل سعید کے نام سے ہوئی ہے اسکی عمر پچیس سال ہے جس کا تعلق کشمیر سے تھا جو سعودی پاک ٹاور میں اے سی ٹیکنشن کا کام کرتا تھا اور جاں بحق ہونے والی کی نعش اس کے آبائی علاقہ میں بھجوا دی گئی ہے۔۔۔۔۔