شر پسندوں نے پٹرول چھڑک کر گھروںکو آگ لگا دی‘آتشزدگی سے 2 مکان جل کر خاکستر ‘پولیس نے تفتیش کا آغاز کر دیا

عوام علاقہ کی آئی جی پولیس سے نوٹس لینے کی استدعا‘ متاثرین کو معاوضہ کی ادائیگی کا مطالبہ

ہفتہ 9 جون 2018 16:11

آٹھ مقام(اُردو پوائنٹ اخبارتازہ ترین - آئی این پی۔ 09 جون2018ء) شر پسندوں نے پٹرول چھڑک کر گھروںکو آگ لگا دی، خوفناک آتشزدگی سے دو مکان جل کر خاکستر پولیس نے تفتیش کا آغاز کر دیا، عوام علاقہ کا آئی جی پولیس سے نوٹس لینے کی استدعا، متاثرین کو معاوضہ کی ادائیگی کا مطالبہ۔ تفصیلات کے مطابق عبدالرشید ولد نواب خان سکنہ نگدر چھے بنی کا رہائشی مکان موضع ڈک ڈھوک میں نامعلوم افراد نے پٹرول چھڑک کر آگ لگا دی آتشزدگی کی وجہ سے دو مکان جل کر خاکستر ہو گئے ہیں۔

(جاری ہے)

مکانات میں قیمتی گھریلو سامان سمیت ہر چیز جل گئی ہے۔ آتشزدگی اتنی شدید تھی کہ ریسکیو کا تصور ہی نہیں کیا جا سکتا تھا۔ مقامی پولیس موقع پر پہنچ کر سانحہ کا جائزہ لیا ہے۔ متاثرین نے تھانہ پولیس لوات کو شرپسندوں کے خلاف کاروائی کے لئے تحریری درخواست دی ہے جس پر باقاعدہ کاروائی شروع کر دی ہے۔ تااہم ابھی تک کوئی گرفتاری عمل میں نہیں آئی ہے۔ تھانہ پولیس لوات کے ایس ایچ او ممتاز خان نے متاثرین کو بھرپور قانونی کاروائی کرنے کی یقین دہانی کروائی ہے۔ عوامی حلقون نے بھی حکومت آزاد کشمیر سے متاثرین کی مدد اور معاوضہ کی ادائیگی کا مطالبہ کیا ہے ۔