کراچی کو مسائل کی دلدل سے نکالنے کیلئے مجلس عمل کا ساتھ دیا جائے،حافظ نعیم الرحمن

کراچی(اُردو پوائنٹ اخبارتازہ ترین - آئی این پی۔ 09 جون2018ء) متحدہ مجلس عمل اقتدار میںآکر سودی نظام کو ختم کرے گی،کراچی کی عوام نے اپنے ہی لوگوں کے ہاتھوں گزشتہ 30سالوں میں جو ظلم سہے ہیں ،اس کی کوئی نظیرنہیں ملتی،کراچی تبدیل ہو رہا ہے اور جب کراچی تبدیل ہوتا ہے تو پورا پاکستان تبدیل ہوجاتا ہے،کراچی کو مسائل کی دلدل سے نکالنے کے لیے مجلس عمل کا ساتھ دیا جائے،پاکستان ماہ رمضان کی 27ویں شب کو آزاد ہوا ،رمضان کا مہینہ حق و باطل کے درمیان فرق پیدا کرتا ہے،قرآن کا نظام ہی امت کو سکون وچین فراہم کرے گا۔

یہ بات متحدہ مجلس عمل کراچی کے صدر و امیر جماعت اسلامی کراچی انجینئرحافظ نعیم الرحمان نے کورنگی نمبر دو میں ڈاکٹر ممتاز عمر کی رہائش گاہ پر عوامی دعوت افطار کے پروگرام سے اپنے خصوصی خطاب میں کہی۔

(جاری ہے)

اس موقع پر متحدہ مجلس عمل پی ایس96کے امیدوار عبدالحفیظ،پی ایس 97کے امیدوار منصور فیروزاور ڈاکٹر ممتاز عمر نے بھی خطاب کیا۔حافظ نعیم الرحمان نے کہا کہ پاکستان صرف ایک خطہ زمین نہیں ہے بلکہ یہ ملک عقیدے اور نظریے کے نام پر قائم ہوا اور ہم نے اللہ سے یہ عہد کیا تھا کہ اللہ کی مر ضی کے مطابق اس ملک کو چلایا جائے گا لیکن ہمارے حکمرانوں نے سودی نظام قائم کیا جو کہ اللہ سے جنگ کے مترادف ہے۔

انھوں نے کہا کہ قرآن رمضان المبارک میں نازل ہوا ہمیں اس کتاب کواپنا امام اور حکمراں بنانا چاہیے تھا لیکن ہم نے ملک میں ہندوانہ اور مغرب کے مادر پدر آزاد نظام کو مسلط کردیا جس کی وجہ سے ملک میں بے حیائی پھیلی۔انہوں نے کہا کہ حضور ?نی13سال مکے میں سخت مشقت کے بعدمدینے میں اسلامی ریاست قائم کی اورزمین سے فسادوانتشار کو ختم کیا۔اسلام ایک مکمل ضابطہ حیات ہے ہمیں اپنے دین پر فخر ہونا چاہیے۔

وہ قومیں ہمیشہ کیلئے غلام ہوجاتی ہیں جو دوسروں کے کلچر اور تہذیب کو خود پر مسلط کرتی ہیں۔مغرب کا نظام بدترین نظام ہے جو غریب کو غریب تر اور امیر کو امیر تر بنا رہا ہے۔انھوں نے کہا کہ آنے والے انتخاب میں کراچی کے عوام کو غنڈہ گردی بھتہ خوری اور بوری بند کلچر سے نجات حاصل کرنی ہے اور متحدہ مجلس عمل کے دیانت دار امیدواروں کو کامیاب بنا کر ظلم کے نظام کا خاتمہ کرنا ہوگا۔

متحدہ مجلس عمل پی ایس 96 کے امیدوار عبدالحفیظ نے اپنے خطاب میں کہا کہ جماعت اسلامی نے کے الیکٹرک ،نادرا اور واٹر بورڈ کے خلاف بھرپور طریقے سے آواز اٹھائی ہے اور اب متحدہ مجلس عمل ہی کراچی کے عوام کے مسائل حل کرائے گی۔متحدہ مجلس عمل پی ایس97 کے امیدوار منصور فیروز نے اپنے خطاب میں کہا کراچی کے عوام انتخاب میں دیانت دار قیادت کو منتخب کریں اور کراچی کو دوبارہ روشنیوں کا شہر بنانے میں اپنا کردار ادا کریں۔ڈاکٹر ممتاز عمر نے اپنے خطاب میں کہا کہ رمضان کا مہینہ رحمتوں برکتوں کا مہینہ ہے۔اس مہینے کے جاتے جاتے ایک ایک لمحے کو سمیٹا جائے اور قرآن سے اپنے تعلق کو مضبوط بنایا جائے۔