بھارت ہوش کے ناخن لے ‘کنٹرول لائن پر اشتعال انگیزی بھارت کو بہت مہنگی پڑے گی‘مودی سرکار کی ظالمانہ پالیسیاں پوری دنیا میں بے نقاب ہو چکی ہیں‘مسئلہ کشمیر کے حل سے جنوبی ایشیا کا امن مشروط ہے

سابق معاون خصوصی وزیر اعظم آزاد کشمیر چودھری محمد اشرف کی میڈیا سے گفتگو

پیر 11 جون 2018 16:07

میرپور(اُردو پوائنٹ اخبارتازہ ترین - آئی این پی۔ 11 جون2018ء) سابق معاون خصوصی وزیر اعظم آزاد کشمیر چودھری محمد اشرف نے کہا کہ بھارت ہوش کے ناخن لے کنٹرول لائن پر اشتعال انگیزی بھارت کو بہت مہنگی پڑے گی۔مودی سرکار کی ظالمانہ پالیسیاں پوری دنیا میں بے نقاب ہو چکی ہیں۔مسئلہ کشمیر کے حل سے جنوبی ایشیا کا امن مشروط ہے۔بھارت کے اندر آزادی کی مختلف تحریکیں چل رہی ہیں ۔

کشمیری بھی اپنی آزادی کے لیے پر امن تحریک جاری رکھے ہوئے ہیں اور آزادی حاصل ہونے تک یہ تحریک جاری رہے گی۔ ریاست جموں وکشمیر کے عوام کی حق خودارادیت کی تحریک کو ریاستی دہشت گردی کے ذریعے کچلنے پر بھارت عالمی سطح پر ایکسپوز ہوچکا ہے۔کشمیری اپنے خون سے آزادی کی تحریک کی آبیاری کررہے ہیں۔

(جاری ہے)

پاکستان کی بقاء اورسلامتی کے لیے ہمارے خون کا آخری قطرہ بھی حاضر ہے۔

ان خیالات کا اظہار اُنہوں نے صحافیوں سے گفتگو کرتے ہوئے کیا۔چودھری محمد اشرف نے کہا پاکستان کا استحکام اور سلامتی ہمارے ایمان کا حصہ ہے۔ کشمیریوں کی شہادتیں رائیگاںنہیں جاسکتیں اوراہل کشمیر حق خودارادیت کی منزل حاصل کرکے رہیں گے۔انہوں نے کہا پاک فوج کی پشت پر پوری کشمیری قوم کھڑی ہے ۔چودھری محمد اشرف نے کہا ریاست کی تقسیم کشمیری کسی صورت برداشت نہیں کرئینگے۔آزادی کشمیریوں کا مقدر ہے اور وہ مل کے رہے گی۔