کراچی:صوبائی الیکشن کمیشن کے دفتر میں ہنگامہ آرائی

لیڈی پولیس نے پی ٹی آئی کی کارکن کو حراست میں لے لیا،صوبائی الیکشن کمشنر سندھ نے آئی جی سندھ کو نفری بڑھانے کی ہدایت کردی

پیر 11 جون 2018 18:19

کراچی (اُردو پوائنٹ اخبارتازہ ترین - این این آئی۔ 11 جون2018ء) کراچی میں صوبائی الیکشن کمیشن آفس میں ہنگامہ آرائی ، دھکم پیل سے شیشہ ٹوٹ گیا ،لیڈی پولیس نے پی ٹی آئی کی کارکن کو حراست میں لے لیا۔دفتر میں ہنگامہ آرائی کے بعد صوبائی الیکشن کمشنر سندھ نے آئی جی سندھ کو نفری بڑھانے کی ہدایت کردی ہے۔

(جاری ہے)

تفصیلات کے مطابق صوبائی الیکشن کمیشن کے دفتر کے گیٹ پر پی ٹی آئی کارکنوں نے سیکورٹی گارڈ سے جھگڑا کیا اور الیکشن کمشنر کے دفتر میں داخل ہونے کی کوشش کی ۔

اس ہنگامی آرائی میں الیکشن کمشنر کے دفتر کا شیشہ ٹوٹ گیا ،جس کے بعد پولیس کے افسران صوبائی الیکشن کمیشن کے دفتر پہنچ گئے ۔ایس پی توقیر نعیم نے کہا کہ ہنگامے میں جو بھی ملوث ہوا قانون کے مطابق کاروائی کریں گے،مجھے قانون کی پاسداری کرنی ہے۔ذرائع کے مطابق لیڈی پولیس اہلکار نے پی ٹی آئی کارکن کو صوبائی الیکشن کمشنر یوسف خٹک کے حکم پر حراست میں لیا ہے ۔