بنگلہ دیش ،ْ مسلسل بارشوں کے باعث روہنگیا پناہ گزین کیمپوں کے قریب ہونے والی لینڈ سلائیڈنگ کے واقعے میں 14 افراد جاں بحق

بدھ 13 جون 2018 16:38

ڈھاکہ (اُردو پوائنٹ اخبارتازہ ترین - این این آئی۔ 13 جون2018ء) بنگلہ دیش میں مسلسل بارشوں کے باعث روہنگیا پناہ گزین کیمپوں کے قریب ہونے والی لینڈ سلائیڈنگ کے واقعے میں 14 افراد جاں بحق ہوگئے۔بنگلا دیشی میڈیا کے مطابق ایک روز قبل نانیار چار کے پہاڑی علاقے پر موسلا دھار بارش کے نتیجے میں مٹی کا تودہ مہاجرین کے کیمپ کے نزدیک آن گرا تھا جس کے نتیجے میں جاں بحق ہونے والوں کی تعداد اب 14 تک پہنچ گئی ہے ،ْ تاحال 25 افراد لاپتہ ہیں جن کی تلاش کے لیے ریسکیو آپریشن جاری رہا۔

ریسکیو ادارے کے منتظم کے مطابق روہنگیا کیمپ کے علاوہ بنگلہ دیش کے دیگر علاقوں میں بھی موسلا دھار بارش اور طوفان باد و باراں نے بڑے پیمانے پر تباہی مچائی ہے اور گزشتہ ایک ہفتے کے دوران پورے ملک میں مختلف حادثات میں 13 افراد ہلاک ہوئے ہیں۔

(جاری ہے)

زیادہ تر ہلاکتیں پہاڑی علاقے میں مٹی کا تودہ گرنے سے ہوئیں۔واضح رہے کہ بین الاقوامی امدادی تنظیموں نے بنگلا دیش میں ہونے والے بارشوں سے دنیا کے سب سے بڑی مہاجرین کی بستی میں متوقع تباہی سے خبردار کرتے ہوئے پناہ گزین کیمپوں کو محفوظ بنانے کے لیے اقدامات کرنے کا مطالبہ کیا تھا۔ اس وقت متاثرہ علاقے میں قائم پناہ گزین کیمپ میں 2 لاکھ روہنگیا افراد مقیم ہیں جن میں سے 29 ہزار مہاجرین کو محفوظ مقام پر منتقل کردیا گیا۔