شعیب ملک نے ویرات کوہلی کا بڑا ریکارڈ توڑ ڈالا

ایشیا ءمیں زیادہ ٹی ٹونٹی رنز بنانے والے بیٹسمین بن گئے

جمعرات جون 11:46

شعیب ملک نے ویرات کوہلی کا بڑا ریکارڈ توڑ ڈالا
ایڈنبرگ(اردو پوائنٹ تازہ ترین اخبار۔14جون 2018 ء) قومی ٹیم کے سابق کپتان اور سینئر ترین بلے باز شعیب ملک نے سکاٹ لینڈ کے خلاف دوسرے ٹی ٹونٹی مقابلے کے دوران بھارتی کپتان ویرات کوہلی کا ریکارڈ توڑ دیا ہے ۔ شعیب ملک نے گزشتہ روز کھیلے گئے مقابلے میں محض22گیندوں پر 49رنز کی ناقابل شکست اننگز کھیلی جس کے ساتھ ہی وہ ویرات کوہلی کو پیچھے چھوڑتے ہوئے ٹی ٹونٹی کرکٹ میں زیادہ رنز بنانے والے بلے بازوں کی فہرست میں تیسرے نمبر پر آگئے ہیں ، ویرات کوہلی نے 57میچز میں 1983رنز سکور کررکھے ہیں جب کہ پاکستانی آل راﺅنڈر اب تک 98مقابلوں میں 31.07کی اوسط سے 1989رنز سکور کرچکے ہیں جن میں 7نصف سنچریاں بھی شامل ہیں،شعیب ملک اب سب سے زیادہ ٹی ٹونٹی رنز سکور کرنے والے ایشیائی بلے باز بھی بن گئے ہیں ، اس فارمیٹ میں نیوزی لینڈ کے اوپنر مارٹن گپٹل 2271رنز کے ساتھ پہلے اور سابق کیوی کپتان برینڈن میکولم2140رنز کے ساتھ دوسر ے نمبر پر موجود ہیں ۔

(جاری ہے)

یاد رہے کہ دوسرے ٹی ٹونٹی میں پاکستان نے پہلے بیٹنگ کرتے ہوئے مقررہ 20 اوورز میں 6 وکٹ کے نقصان پر 166 رنز بنائے جس کے جواب میں سکاٹ لینڈ کی پوری ٹیم 82 رنز پر پویلین لوٹ گئی۔سکاٹ لینڈ کی جانب سے جارج منسی اور کائیل کوئٹزر نے اننگز کا آغاز کیا لیکن محمد عامر کی جگہ ٹیم کا حصہ بننے والے محمد عثمان خان نے تیسری ہی گیند پر منسی کو پویلین واپس بھیج دیا جب کہ کپتان کائیل بھی ایک رنز پر محمد عثمان کا شکار بنے۔

فہیم اشرف نے بھی عثمان خان کا بھرپور ساتھ دیتے ہوئے اگلے دو کھلاڑیوں کو پویلین کی راہ دکھائی، رچی بیرنگٹن 20 اور کالم مکلاوڈ 25 رنز بناکر فہیم کا شکار بنے جب کہ صفیان شریف نے 10 رنز بنائے، ان بلے بازوں کے علاوہ سکاٹ لینڈ کا کوئی بھی کھلاڑی ڈبل فیگر میں داخل نہ ہوسکا۔ قومی ٹیم کی جانب سے فہیم اشرف نے3، عثمان خان نے 2 وکٹیں حاصل کیں۔اس سے قبل میچ کا ٹاس قومی ٹیم کے کپتان سرفراز احمد نے جیٹ کر پہلے خود بیٹنگ کا فیصلہ کیا، پاکستان کی جانب سے فخر زمان اور احمد شہزاد نے ٹیم کو اچھا آغاز فراہم کیا اور پہلی وکٹ 60 رنز کے مجموعی سکور پر گری، احمد شہزاد 24 رنز کی اننگز کھیل کر پویلین واپس لوٹے۔

اگلے ہی اوور میں فخرزمان بھی پویلین جاپہنچے، وہ 33 رنز کی اننگز کھیل کر آﺅٹ ہوئے جس میں 6 چوکے شامل تھے جس کے بعد طلعت حسین اور کپتان سرفراز احمد بیٹنگ کے لیے آئے لیکن مارک واٹ نے باﺅنڈری لائن پر پچھلے میچ کے ہیرو سرفراز کا ناقابل یقین کیچ پکڑ کر ان کی اننگز کا 14 رنز پر خاتمہ کیا۔مائیکل لیسک نے ایک ہی اوور میں پہلے حسین طلعت کو پویلین واپس بھیجا، وہ 17 رنز کی اننگز کھیل سکے جب کہ ایک ہی گیند بعد آصف علی بھی بغیر کوئی رنز بنائے لیسک کا شکار بنے تاہم شاداب خان نے شعیب ملک کے ساتھ ملکر 50 رنز کی عمدہ شراکت قائم کی اس دوران شاداب خان 17 رنز بناکر پویلین واپس لوٹ گئے تاہم شعیب ملک ناقابل شکست 49 رنز کی جارحانہ اننگز کھیلنے میں کامیاب رہے جس میں 5 چھکے بھی شامل تھے۔