نگران وزیراعلیٰ پنجاب ڈاکٹر حسن عسکری سے کور کمانڈر لاہور لیفٹیننٹ جنرل عامر ریاض کی ملاقات

نگران وزیراعلیٰ کا دہشتگردی کیخلاف جنگ میں پاک افواج کی قربانیوں کو خراج تحسین،شہداء کی قربانیوں کوخراج عقیدت دہشت گردی، انتہاپسندی، عسکریت پسندی اور فرقہ واریت کے مائنڈسیٹ کو بھی پوری قوت سے کچلنا ہوگا،حسن عسکری قوم کو اپنی بہادر مسلح افواج پر فخر ہے ، پاکستان کی افواج نے دہشت گردی کیخلاف جنگ میں لازوال کردار ادا کیا ہے شہدائ کی لازوال قربانیوں کا ثمر امن کی صورت میں ملا ہے، قوم شہداء کی عظیم قربانیوں کو سلام پیش کرتی ہے

جمعرات 14 جون 2018 20:19

نگران وزیراعلیٰ پنجاب ڈاکٹر حسن عسکری سے کور کمانڈر لاہور لیفٹیننٹ ..
لاہور(اُردو پوائنٹ اخبارتازہ ترین - آئی این پی۔ 14 جون2018ء) نگران وزیراعلیٰ پنجاب ڈاکٹر حسن عسکری سے جمعرات کووزیراعلیٰ آفس میں کور کمانڈر لاہور لیفٹیننٹ جنرل عامر ریاض نے ملاقات کی۔نگران وزیراعلیٰ ڈاکٹر حسن عسکری نے دہشت گردی کے خلاف جنگ میں پاک افواج کی عظیم قربانیوں کو خراج تحسین پیش کیااورشہدائ کی عظیم قربانیوں کو شاندار الفاظ میں خراج عقیدت پیش کیا۔

ڈاکٹر حسن عسکری نے اس موقع پر گفتگو کرتے ہوئے کہا کہ قوم کو اپنی بہادر مسلح افواج پر فخر ہے اوردہشت گردی کے خلاف جنگ پاکستان کی بقائ کی جنگ ہے۔ دہشت گردی کے خلاف جنگ میں پوری قوم متحد ہے۔انہوںنے کہا کہ پاکستان کی افواج نے اس جنگ میں تاریخی اور لازوال کردار ادا کیا ہے۔ مسلح افواج، پولیس اور قانون نافذ کرنے والے دیگر اداروں سمیت معاشرے کے ہر طبقے نے بیش قیمت قربانیاں دی ہیں۔

(جاری ہے)

انہوںنے کہا کہ اس جنگ میں اپنی قیمتی جانوں کا نذرانہ پیش کرنے والے پاکستان کے بہادر سپوت قوم کے ہیرو ہیں۔ شہدائ کی لازوال قربانیوں کا ثمر امن کی صورت میں ملا ہے۔انہوںنے کہا کہ قوم شہدائ کی عظیم قربانیوں کو سلام پیش کرتی ہے۔ پاکستان کے محب وطن اور دلیر عوام کا عزم انتہائی مضبوط ہے۔انہوںنے کہا کہ سفاک قاتل بہادر پاکستانیوں کے غیر متزلزل عزم کے سامنے نہیں ٹھہر سکتا۔

پاکستان کی بہادر مسلح افواج نے دہشت گردی کے خلاف جنگ میں جرأت کی نئی تاریخ رقم کی ہے۔انہوںنے کہا کہ پاک افواج اندرونی اور بیرونی چیلنجز سے نمٹنے کی پوری صلاحیت رکھتی ہیں۔پاکستان نے دہشت گردی کے خلاف جنگ میں بے مثال کامیابیاں سمیٹی ہیں۔انہوںنے کہا کہ دہشت گردی، انتہاپسندی، عسکریت پسندی اور فرقہ واریت کے مائنڈسیٹ کو بھی پوری قوت سے کچلنا ہوگا۔