عمران خان کے حامی کو لگتا ہے اس کے ساتھ دھوکا ہوا ،ْریحام خان

نئی دہلی (اُردو پوائنٹ اخبارتازہ ترین - این این آئی۔ 18 جون2018ء) پاکستان تحریک انصاف کے چیئرمین عمران خان کی سابق اہلیہ ریحام خان نے کہا ہے کہ جس نے عمران خان کو سپورٹ کیا وہ محسوس کر رہا ہے کہ اس کے ساتھ دھوکا ہوا۔بھارتی ٹی وی چینل کو انٹرویو میں انہوںنے کہا کہ الیکشن کے لیے پی ٹی آئی نے بمشکل 15 سی20 ٹکٹ پرانے کارکنوں کو دیے، اسٹیٹس کو کے معاملے پر پی ٹی آئی کی سیاست نچلی ترین سطح پرہے۔

عمران خان کی سابق اہلیہ نے کہا کہ وہ ووٹ کے لیے مذہب کو استعمال کرنے کی مخالف ہیں۔ریہام خان نے کہا کہ محنت سے کتاب لکھی ہے جو ابھی آئی نہیں اس لیے قانونی نوٹس بھیجنے کا جواز نہیں بنتا۔انٹرویو کے دوران ریحام خان نے کہا کہ اگر آپ کو کتاب چاہیے تو بنی گالہ فون کرکے کاپی لے سکتے ہیں ،ْ نواز شریف کو بھی میری کتاب چاہیے تو وہیں سے مل سکتی ہے۔

(جاری ہے)

ان کا کہنا تھا کہ سیاست میں نفرت انگیزی کے لیے کوئی جگہ نہیں ہے۔یاد رہے کہ پاکستان تحریک انصاف کے چیئرمین عمران خان کی سابق اہلیہ ریحام خان کی آنے والی کتاب شائع ہونے سے پہلے ہی تنازعات کا شکار ہوگئی ہے۔2 جون کو تحریک انصاف کے مرکزی ترجمان فواد چوہدری نے ٹوئٹر پر اپنے پیغام میں کہا تھا کہ ریحام خان کی کتاب کی تصنیف و اشاعت کا سارا ڈرامہ حقیقی اپوزیشن کو گرانے کے لیے رچایا گیا اور اس سارے معاملے سے پی ٹی آئی اًپ سیٹ ہے۔

فواد چوہدری کا کہنا تھا کہ ریحام خان کی ملاقاتوں کے سارے ثبوت مل گئے ہیں کہ انہوں نے مریم نواز سے ملاقات کی جس کا اہتمام احسن اقبال نے کروایا، اس ملاقات کے ناقابل تردید شواہد نے ساری سازش کا پول کھول دیا ہے تاہم احسن اقبال کی جانب سے اس الزام کی تردید کی جاچکی ہے۔دوسری جانب پی ٹی آئی رہنما حمزہ علی عباسی اور گلوکار سلمان احمد کی جانب سے ریحام خان پر کتاب لکھنے کے لیے سابق وزیراعلیٰ پنجاب شہباز شریف سے ایک لاکھ پاؤنڈز لینے اور احسن اقبال کے توسط سے مریم نواز سے ملاقات کا الزام عائد کیا گیا تھا۔

برطانیہ میں بھی ایک لاء فرم کی جانب سے ریحام خان کو ان کی کتاب کے حوالے سے قانونی نوٹس بھجوایا گیا ہے۔دوسری جانب ریحام خان نے بھی حمزہ علی عباسی کو قانونی نوٹس بھجوایا ہے جس میں کہا گیا ہے کہ حمزہ عباسی نے ان سے متعلق جھوٹی خبریں پھیلائیں، لہذا وہ غیر مشروط معافی مانگیں۔