نیلم جہلم پراجیکٹ کے ایک اور یونٹ نے بجلی کی پیداوار شروع کر دی

10 روز کے بعد نیلم جہلم سے نیشنل گرڈ کو بجلی کی فراہمی بڑھ کر 484اعشاریہ 50میگاواٹ ہو جائے گی

منگل جون 18:40

لاہور(اُردو پوائنٹ اخبارتازہ ترین۔ 19 جون2018ء) نیلم جہلم ہائیڈرو پاور پراجیکٹ کے ایک اور یونٹ نے اپنی پوری صلاحیت کے مطابق بجلی کی پیداوار شروع کر دی ہے ۔ یہ یونٹ 242اعشاریہ 25میگاواٹ بجلی پیدا کر رہا ہے اور یہ بجلی نیشنل گرڈ کو مہیا کی جارہی ہے ۔ مذکورہ یونٹ تعمیراتی معاہدے کی رو سے ابتدائی طور پر اگلے تین روز اور اِس کے بعد مزید ایک ماہ تک اپنے ریلائی ایبلٹی پیریڈ میں رہے گا اور اِس دوران مسلسل پوری پیداواری صلاحیت کے مطابق بجلی کی پیداوار جاری رکھے گا ۔

قبل ازیں اِس یونٹ کو جس کا نام یونٹ نمبر4ہے ، اپریل کے مہینے میں آپریشنل کیا گیا تھا اور اِس یونٹ نے ٹیسٹ رن کے دوران نیشنل گرڈ کو 13 لاکھ یونٹ بجلی بھی فراہم کی تھی ۔ تاہم مختلف ٹیسٹ کے دوران اِس یونٹ میں معمولی نوعیت کے تکنیکی مسائل سامنے آئے ،جنہیں کنٹریکٹرنے دور کر دیا ہے اور اب یہ یونٹ اپنی پوری پیداواری صلاحیت کے مطابق بجلی پیدا کر رہا ہے ۔

(جاری ہے)

نیلم جہلم ہائیڈرو پاور پراجیکٹ کے پہلے یونٹ یونٹ نمبر3 کا30 روزہ ریلائی ایبلٹی پیریڈ 18 مئی کو شروع ہوا تھا ،جو آج کامیابی کے ساتھ مکمل ہو گیا ہے ۔گزشتہ ایک ماہ کے دوران اِس یونٹ نے اپنی پوری صلاحیت کے مطابق مسلسل 242 اعشاریہ 25 میگاواٹ بجلی پیدا کی اور اِس دوران نیشنل گرڈ کو 20 کروڑ یونٹ سے زیادہ بجلی مہیا کی ۔ریلائی ایبلٹی پیریڈ کی تکمیل کے بعد تعمیراتی معاہدے کے تحت اِس یونٹ سے اب اگلے 10روز تک بجلی پیدا نہیں کی جائے گی اور اِس دوران یونٹ کو واپڈا کے حوالے کرنے سے پہلے اِس میں معمولی تکنیکی ایڈجسٹمنٹ کی جائیں گی ۔

بعد ازاں یہ یونٹ بھی 242 اعشاریہ 25 میگاواٹ بجلی مہیا کرے گا اور یوں تقریبا 10 روز کے بعد نیلم جہلم ہائیڈرو پاور پراجیکٹ سے بجلی کی پیداوار 484اعشاریہ 50 میگاواٹ تک پہنچ جائے گی ۔یہ بات اہم ہے کہ میڈیا کی بعض رپورٹس کے برعکس نیلم جہلم ہائیڈرو پاور پراجیکٹ کے یونٹس ہدف کے مطابق مکمل ہونے کے بعد تعمیراتی معاہدے کے تحت مختلف ٹیسٹ کے مراحل سے گزر رہے ہیں ۔نیلم جہلم ہائیڈرو پاور پراجیکٹ کی مجموعی پیداواری صلاحیت 969میگاواٹ ہے ۔ اِس کے چار پیداواری یونٹ ہیں اور ہر یونٹ کی صلاحیت 242اعشاریہ 25میگاواٹ ہے ۔

متعلقہ عنوان :