Live Updates

ووٹرز کی تفصیلات لیکس کا معاملہ ،ْنادرا حکام نے تمام الزامات کی تردید کر دی

انٹرنیٹ ووٹنگ کی پریزنٹیشن خود سید مظفر علی دینے گئے تھے ،ْماضی میں بھی الیکشن کے وقت جھوٹے الزامات لگائے جاتے رے ہیں ،ْادارے کی ساکھ کے لیے جو بھی اقدامات اٹھانے پڑے اٹھائیں گے ،ْڈی جی نادرا ذوالفقار علی کی ساتھیوں کے ہمراہ پریس کانفرنس

منگل 19 جون 2018 18:50

اسلام آباد(اُردو پوائنٹ اخبارتازہ ترین - این این آئی۔ 19 جون2018ء) نادرا حکام نے شہریوں کا ڈیٹا لیکس ہونے سے متعلق تمام الزامات کی تردید کر دی۔ منگل کو اسلام آباد میں نادرا کے 4 ڈائریکٹر جنرلز نے مشترکہ پریس کانفرنس کرتے ہوئے کہا کہ کسی بھی ایک شہری کا ڈیٹا کسی بھی پلیٹ فارم سے شیئر نہیں کیا گیا۔ڈی جی نادرا ذوالفقار علی نے کہاکہ آج تک نادرا کی تاریخ میں کوئی ڈیٹا لیک نہیں ہوا۔

انہوں نے بتایا کہ کرپشن پرنکالے گئے سابق افسر سید مظفر کی طرف سے الزامات عائد کیے گئے اور ایک سال قبل ایک انٹرنل ای میل ایک ٹی وی پر چلائی گئی۔انہوںنے کہاکہ کسی بیان کی تردید کر رہے ہیں اور نہ تصدیق، اس ای میل کا ڈیٹا لیک ہونے سے کوئی تعلق نہیں ہے۔ذوالفقار علی نے کہا کہ انٹرنیٹ ووٹنگ کی پریزنٹیشن خود سید مظفر علی دینے گئے تھے۔

(جاری ہے)

انہوں نے کہا کہ ماضی میں بھی ایسا ہوتا رہا ہے کہ الیکشن کے وقت جھوٹے الزامات لگائے جاتے ہیں۔

انہو ںنے کہاکہ جتنے بھی دہری شہریت والے ادارے میں ہیں ان سے متعلق عدالت کو بتایا گیا۔انہوںنے کہاکہ دہری شہریت کیس میں سپریم کورٹ نے ہمارے اقدامات کو سراہا، اوور سیز ووٹنگ کے بارے میں بھی سپریم کورٹ نے ہمارے ادارے کی تعریف کی۔ڈی جی نادرا نے کہا کہ ہر سال ادارے کا آڈٹ کیا جاتا ہے اور ہم الیکشن کمیشن کو وضاحت دے چکے ہیں کہ کسی ایک بھی شہری کا ریکارڈ کسی کے ساتھ شیئر نہیں کیا گیا۔

ان کا کہنا تھا کہ ادارے کی ساکھ کے لیے جو بھی اقدامات اٹھانے پڑے اٹھائیں گے۔خیال رہے کہ پاکستان تحریک انصاف نے ڈی جی نادرا پر الزام عائد کیا تھا کہ انہوں نے شہریوں کا ڈیٹا لیک کیا تھا۔چیئرمین تحریک انصاف عمران خان نے اس حوالے سے الیکشن کمیشن کو ایک خط بھی تحریر کیا جس میں انہوں نے ڈی جی نادرا پر جانبداری کا الزام عائد کرتے ہوئے کہا کہ ان کی موجودگی میں شفاف الیکشن ممکن نہیں اس لیے انہیں عہدے سے ہٹایا جائے۔دوسری جانب الیکشن کمیشن نے بھی نادرا حکام کو خط لکھ کر اس معاملے پر وضاحت طلب کی تھی۔
Live پاکستان تحریک انصاف سے متعلق تازہ ترین معلومات