طلال چودھری توہین عدالت کیس، سماعت انتخابات کے بعد تک ملتوی کرنے کی استدعا مسترد

ہمیں آپکی مشکل سے واسطہ نہیں، الیکشن لڑنا آپ کا کام ہے ،ْ جسٹس گلزار احمد کا طلال چوہدری سے مکالمہ

منگل 19 جون 2018 18:50

اسلام آباد (اُردو پوائنٹ اخبارتازہ ترین - این این آئی۔ 19 جون2018ء) سپریم کورٹ نے سابق وزیر مملکت طلال چودھری توہین عدالت کیس کی سماعت ملتوی کرنے کی درخواست مسترد کر دی جبکہ جسٹس گلزار احمد نے طلال چودھری کو مخاطب کرتے ہوئے کہا کہ ہمیں آپکی مشکل سے واسطہ نہیں، الیکشن لڑنا آپ کا کام ہے۔سپریم کورٹ میں طلال چودھری توہین عدالت کیس کی سماعت، طلال چودھری کی عام انتخابات تک سماعت ملتوی کرنے کی استدعا مسترد کرتے ہوئے کہاگیا کہ جج صاحبان خصوصی طور پر کیس کے لیے کراچی سے آئے ہیں، یہاں تقریر نہ کریں، کیس ملتوی کرنا ممکن نہیں۔

جسٹس گلزار احمد نے برہم ہوکر لیگی رہنماء کو 21 جون تک گواہان اور شواہد پیش کرنے کا حکم دے دیا۔طلال چودھری کے وکیل کامران مرتضیٰ کی جگہ جونئیر وکیل نے عدالت میں پیش ہو کر استدعا کی کہ کامران مرتضیٰ کی طبیعت ناساز ہے، سماعت ملتوی کر دیں۔

(جاری ہے)

جسٹس گلزار نے طلال چودھری سے استفسار کیا، بتائیں کیا کیس خود لڑیں گی طلال چودھری نے کہا کہ پہلے ہی بہت مشکل سے وکیل ملا ہے، الیکشن مہم میں مصروف ہوں، کیس الیکشن کے بعد تک ملتوی کر دیں۔جسٹس گلزار نے کہا کہ ہمیں آپکی مشکل سے واسطہ نہیں، الیکشن لڑنا آپ کا کام ہے۔ 21 جون تک وکیل پیش کریں یا متبادل وکیل کا انتظام کریں۔ عدالت نے جی ایم آپریشن پیمرا کو آئندہ سماعت پر طلب کرتے ہوئے سماعت ملتوی کر دی۔