ْ آزادکشمیر میں جاری ترقیاتی منصوبوں کی بروقت تکمیل کو یقینی بنایا جائے ،ْسردار مسعود خان

صدرکا مقبوضہ کشمیر میں بھارتی فورسز کے ہاتھوں حالیہ جاری ظلم و جبر کی نئی لہر پر شدید تشویش کا اظہار ، اقوام متحدہ بین الاقوامی برادری سے موجودہ صورتحال کا نوٹس لینے کی اپیل

جمعرات 21 جون 2018 17:10

اسلام آباد(اُردو پوائنٹ اخبارتازہ ترین - این این آئی۔ 21 جون2018ء) صدر آزادجموں و کشمیر سردار مسعود خان نے کہا کہ آزادکشمیر میں جاری ترقیاتی منصوبوں کی بروقت تکمیل کو یقینی بنایا جائے تاکہ عوام کو اس کا ریلیف مل سکے اور وہ جلد از جلد ان منصوبوں سے مستفید ہو سکیں ۔ اِن خیالات کا اظہار صدر نے ممبر کشمیر کونسل عبدالخالق وصی سے بات چیت کرتے ہوئے کیا جنہوں نے گزشتہ روز (جمعرات )کوصدر آزادجموں و کشمیر سے صدارتی بلاک کشمیر ہائوس اسلام آباد میں ملاقات کی ۔

(جاری ہے)

صدر نے کہا کہ روڈ انفراسٹرکچر کی تعمیر سے جہاں آزادکشمیر کے لوگوں کو بہتر سفری سہولیات دستیاب ہوں گی وہاں سیر و سیاحت کو بھی فروغ ملے گا اور آزادکشمیر سیاحوں کے لئے پرکشش سیاحتی مقام بن جائے گا ۔صدر نے کہا کہ لوگوں کو پینے کا صاف پانی کی فراہمی کو بھی ترجیح بنیادوں پر یقینی بنایا جائے گا۔صدر نے مقبوضہ کشمیر میں بھارتی فورسز کے ہاتھوں حالیہ جاری ظلم و جبر کی نئی لہر پر شدید تشویش کا اظہار کیا ہے اور بھارتی مظالم کی سخت مذمت کی اور اقوام متحدہ بین الاقوامی برادری سے موجودہ صورتحال کا نوٹس لینے کی اپیل کی۔