وفاقی وزیر داخلہ کا مشکوک کردار سامنے آ چکا ہے ،اعظم خان نے پی ٹی آئی سے وابستگی کی بنیاد پر زلفی بخاری کے لئے قانون کو موم بنا دیا

پیپلزپارٹی کے رہنما سعید غنی کا بیان

جمعرات 21 جون 2018 19:50

اسلام آباد(اُردو پوائنٹ اخبارتازہ ترین - آئی این پی۔ 21 جون2018ء) پاکستان پیپلزپارٹی کے رہنما سعید غنی نے کہا ہے کہ وفاقی وزیر داخلہ کا مشکوک کردار سامنے آ چکا ہے کیونکہ وزیر داخلہ اعظم خان نے پی ٹی آئی سے وابستگی کی بنیاد پر زلفی بخاری کے لئے قانون کو موم بنا دیا۔ انہوں نے کہا کہ ایسے حالات میں کیسے ممکن ہے کہ نگران حکومت نے ایسے شخص کو وزارت داخلہ میں فائز کیا جائے جو حکومتی مشینری کو استعمال کر سکتا ہے۔

(جاری ہے)

سعید غنی نے کہا کہ ماروی میمن تاحال بینظیر انکم سپورٹ پروگرام کی چیئرپرسن ہیں جبکہ ماروی میمن کی وابستگی ن لیگ سے ہے۔ انہوں نے کہا کہ ماروی میمن ن حکومت کے خاتمے کے بعد بھی انکم سپورٹ پروگرام کے فنڈز استعمال کر رہی ہے اور اپنے ماتحت ملازمین کو مسلم لیگ(ن) کے حق میں مہم چلانے پر استعمال کر رہی ہے۔ سعید غنی نے الیکشن کمیشن سے کہا کہ وہ وزیر داخلہ اعظم خان اور ماروی میمن کو عہدوں سے الگ کر دیں۔