پولیو ٹیموں کو درپیش مسائل کے حل کیلئے تمام وسائل بروئے کار لائے جائیں گے ،ڈی سی مردان

جمعرات جون 20:40

مردان۔ (اُردو پوائنٹ اخبارتازہ ترین۔ 21 جون2018ء) ڈپٹی کمشنر مردان محمد عثمان محسود نے کہا کہ پولیو کے خاتمے کے لیے حکومت ،سرکاری اداروں ،علمائے کرام اور عوام کو مل جل کر کام کرنا ہے ۔گذشتہ این آئی ڈی میں ہماری ٹیم کی کارکردگی مثالی رہی ہے اور دو جولائی سے شروع ہونے والے پولیو کے خلاف قومی مہم میں ہم اپنی کارکردگی کو مزید بہتر بنائیں گے ۔

وہ ٹی ایم اے ہال میں انسداد پولیو کی ضلعی کمیٹی کے اجلاس سے خطاب کررہے تھے جس میں تمام یونین کونسلوں سے پولیو کمیٹیوں کے ارکان ، ڈاکٹروں ، ضلعی کونسلرز اور ہیلتھ سٹاف نے شرکت کی ۔اجلاس سے قائمقام ضلعی ناظم مردان اسد علی کشمیری ، ڈی ایچ او ڈاکٹر فضل ہادی ، ڈاکٹر شمیم اوراسسٹنٹ کمشنر عمران خان نے بھی خطاب کیا ۔ اس موقع پر یونین کونسل سطح پر پولیو ٹیموں نے اپنی مشکلات اور مسائل سے ڈپٹی کمشنر کو آگاہ کیا ۔

(جاری ہے)

اجلاس کو بتایا گیا کہ گذشتہ این آئی ڈی میں ضلع مردان نے تمام اہداف کامیابی سے حاصل کیے اور پولیو ٹیموں نے بھرپور محنت کی ۔ڈپٹی کمشنر عثمان محسود نے کہا کہ پولیو ٹیموں کو درپیش مسائل کے حل کے لیے تمام وسائل بروئے کار لائے جائیں گے ۔ریفرشمنٹ کا مسئلہ حل کردیا جائے گا جبکہ اچھی کارکردگی دکھانے والوں کو نقد انعامات اور اسناد بھی دی جائیں گی ۔اُنہوں نے کہا کہ پولیو کے خلاف قومی سطح پر جنگ جاری ہے اور ہم سب کو اپنے ملک کو اس خطرناک بیماری سے پاک کرنے کے لیے اس میں بھرپور انداز سے حصہ لینا ہے ۔قبل ازیں اجلاس کو بتایا گیا کہ دو جولائی سے شروع ہونے والے مہم میں چار لاکھ پانچ ہزار بچوں کو پولیو ویکسین کے قطرے پلائے جائیں گے ۔