آزادانہ، شفاف انتخابات کا انعقاد قومی ذمہ داری ہے،چیف سیکرٹری پنجاب

لاہور۔22 جون(اُردو پوائنٹ اخبارتازہ ترین - اے پی پی۔ 22 جون2018ء) چیف سیکرٹری پنجاب اکبر حسین درانی نے کہا ہے کہ آزادانہ، منصفانہ اورشفاف انتخابات کا انعقاد قومی ذمہ داری ہے، اس ذمہ داری کو پورا کر نے کیلئے الیکشن کمیشن کی ہدایات کی روشنی میں ہرممکن اقدامات کئے جائیںگے، سول سیکرٹریٹ میں کمشنرز اور ڈپٹی کمشنرز کے ویڈیولنک اجلاس کی صدارت کرتے ہوئے چیف سیکرٹری نے کہا کہ امن وامان کا قیام پرامن انتخابات کیلئے کلیدی حیثیت رکھتا ہے، انہوں نے تمام انتظامی افسرانکو ہدایت کی کہ انتخابات کے دوران امن وامان برقرار رکھنے کیلئے بہترین انتظامات یقینی بنائے جائیں، انہوں نے کہا کہ ڈویژن اور ضلع کی سطح پر انٹیلیجنس کمیٹیوں کو فعال بنایا جائیاورصورتحال کی مانیٹرنگ کیلئے ان کمیٹیوں کے اجلاس باقاعدگی سے منعقد کئے جائیں، انہوں نے کہا کہ امن وامان اور پرامن فضا برقرار رکھنے کیلئے جدید ٹیکنالوجی سے بھرپور استفادہ کیا جائے، انہوں نے ہدایت کی کہ الیکشن کمیشن کی جانب سے جاری ہونیوالے ضابطہ اخلاق پر عملدرآمد یقینی بنایا جائے،چیف سیکرٹری نے حکم دیا کہ عوام کے مسائل کے حل کیلئے افسران اوپن ڈور پالیسی اختیار کریں، انہوں نے کہا کہ امن وامان کی طرح ڈینگی کنٹرول، ممکنہ سیلاب سے نمٹنے کیلئے انتظامات بھی ترجیحات میں شامل ہیں، انہوں نے ہدایت کی کہ صوبہ میں انسداد ڈینگی سرگرمیوں کو تیز کیا جائے، ڈینگی کے خاتمے کیلئے مسلسل کوششوں کی ضرورت ہے، انہوں نے کہا کہ ڈینگی پر قابو پانے کیلئے عوام کا تعاون نہایت اہمیت کا حامل ہے، انسداد ڈینگی کے حوالے سے عوام میں آگاہی کو بڑھایا جائے اور اس سلسلے میں تمام محکمے فعال کردار ادا کریں، انہوں نے ہدایت کی کہ ممکنہ سیلا سے نمٹنے کیلئے تمام تیاریاں مکمل رکھی جائیں، دریاوئں اور ڈیموں میں پانی کی سطح اور موسم کی صورتحال کی باقاعدہ مانیٹرنگ کی جائے، سیکرٹری داخلہ نسیم نواز نے بتایا کہ الیکشن کے دوران ا من وامان برقراررکھنے کیلئے تمام اضلاع کی انتظامیہ کو ضروری ہدایات جاری کر دی گئی ہیں، سیکرٹری آبپاشی نے اجلاس کو بریفنگ میں بتایا کہ دریائوں اور ڈیموں میں پانی کا بہائو معمول کے مطابق ہے اور سیلاب کا کوئی خطرہ نہیں، اجلاس میں سیکرٹری بلدیات، سیکرٹری پرائمری ہیلتھ ، سیکرٹری سکولز ایجوکیشن ،کمشنر لاہور ، چیف میٹرولوجسٹ اور متعلقہ افسران نے شرکت کی ۔