سی ڈی اے شعبہ انفورسمنٹ کا ضلعی انتظامیہ اورپولیس کی مدد سے سیکٹر ایچ سولہ میں قبضہ مافیا کے خلاف آپریشن

اسلام آباد جیل کیلئے مختص15کنال سے زائد اراضی واگزار کرالی

جمعہ 22 جون 2018 23:16

اسلام آباد(اُردو پوائنٹ اخبارتازہ ترین - آن لائن۔ 22 جون2018ء) وفاقی ترقیاتی ادارہ (سی ڈی اے )کے شعبہ انفورسمنٹ نے ضلعی انتظامیہ اورپولیس کی مدد سے سیکٹر ایچ سولہ میں قبضہ مافیا کے خلاف آپریشن کرتے ہوئے اسلام آباد جیل کیلئے مختص15کنال سے زائد اراضی واگزار کرالی ہے۔

(جاری ہے)

تفصیلات کے مطابق اسلام آباد میں نئی جیل کے قیام کے لئے وفاقی ترقیاتی ادارہ (سی ڈی ای)انتظامیہ کی جانب سے سیکٹر ایچ سولہ زمین مختص کی گئی تاہم مذکورہ زمین پر لینڈ مافیا نے قبضہ کرتے ہوئے یہاں پر پختہ تجارتی و رہائشی عمارات اورجانوروں کے باڑے بنا لئے تھے جبکہ قبضہ مافیا نے مذکورہ علاقے میں بڑے پیمانے پر فصلیں بھی کاشت کررکھی تھی تاہم گزشتہ روزسی ڈی اے کے شعبہ انفورسمنٹ نے ڈائریکٹر انفورسمنٹ اربن عشرت تاج وارثی کی سربراہی میں بڑے پیمانے پر آپریشن کرتے ہوئے 15کنال سے زائد اراضی قبضہ مافیا سے واگزار کروالی ہے۔

مذکورہ آپریشن میں ضلعی انتظامیہ اسسٹنٹ کمشنر سعد اورپولیس کی بھاری نفری نے حصہ لیا۔واضح رہے کہ مذکورہ علاقے میں آپریشن آئندہ بھی جاری رہے گا۔