راولپنڈی چیمبر کا حکومت سے روپے کی قدر کو سنبھالا دینے کے لیے فوری اقدامات کرنے کا مطالبہ

ادائیگیوں میں عدم توازن ،گرانی میں اضافہ اور معیشت پر منفی اثرات مرتب ہوں گے

ہفتہ 23 جون 2018 17:16

راولپنڈی چیمبر کا حکومت سے روپے کی قدر کو سنبھالا دینے کے لیے فوری اقدامات ..

راولپنڈی (اُردو پوائنٹ اخبارتازہ ترین - اے پی پی۔ 23 جون2018ء) راولپنڈی چیمبر آف کامرس( آر سی سی آئی) نے روپے کی قدر میں کمی پر تشویش کا اظہار کرتے ہوئے حکومت سے فوری اقدامات کا مطالبہ کر دیا ۔ترجمان آر سی سی آئی نے اے پی پی کو بتایاکہ راولپنڈی چیمبر آف کامرس اینڈ انڈسٹری کے صدر زاہد لطیف خان نے گذشتہ روزچیمبر ہاوس میں تاجروں کے ایک وفد سے ملاقات میں ڈالر کے مقابلے میں روپے کی گرتی ہوئی قدر پر گہری تشویش ظاہر کی ہے اور کہاہے کہ روپے کی قدر میں کمی سے ادائیگیوں میں عدم تواز ن پیدا ہو گا، بیرونی قرضوں میں مزید اضافہ ہو گا اور معیشت پر منفی اثرات مرتب ہوں گے ۔

انہوں نے نگران وزیر خزانہ شمشاد اختر سے مطالبہ کیا کہ حکومت روپے کی قدر کو سنبھالا دینے کے لیے فوری اقدامات کرے۔

(جاری ہے)

انہوں نے کہا کہ اگر اس حوالے سے فوری اقدامات نہ کیے گئے تو ملک میں گرانی مزید بڑھے گی ۔انہوں نے کہا کہ بیرون ملک سفر، تعلیم، علاج معالجے اور سیاحتی مقاصد کے لیے ڈالر کی ضرورت پڑتی ہے ۔مارکیٹ میں ڈالر کی عدم دستیابی کی بھی شکایات آرہی ہیں اور سپلائی کم ہونے کے باعث لوگوں کو ڈالر کے حصول میں شدید مشکلات کا سامنا ہے انہوں نے کہا کہ روپے کی گرتی ہوئی قدر کے باعث معیشت سست روی کا شکار ہو گی جو ملک کے لیے نقصان دہ ہے پاکستان میں صنعتی ترقی کا دارو مدار خام مال کی ستیابی پر ہے جبکہ روپے کی گراوٹ کی وجہ سے خام مال اور مشینری مزید مہنگی ہو جائے گی جس سے پیداواری لاگت میں اضافہ ہوگا۔