کراچی ،25 جون کو پولنگ اسٹیشنز کی فہرست جاری کردی جائیگی

چیف سیکریٹری کی زیر صدارت تمام انتخابات 2018 کے انعقاد کے سلسلے میں اہم اجلاس ،صوبائی الیکشن کمشنر، آئی جی سندھ ، ایس ایم بی آر اور دیگر افسران کی شرکت

ہفتہ 23 جون 2018 19:05

کراچی (اُردو پوائنٹ اخبارتازہ ترین - این این آئی۔ 23 جون2018ء) چیف سیکریٹری سندھ میجر ریٹائرڈ اعظم سلیمان خان کی زیر صدارت تمام انتخابات 2018 کے انتظامات کے سلسلے میں اہم اجلاس منعقد ہوا ، جس میں صوبائی الیکشن کمشنر محمد یوسف خان خٹک ، آئی جی پولیس سندھ امجد جاوید سلیم ، سینئر میمبر بورڈ آف ریوینیو اقبال حسین درانی ، سیکریٹری اسکول ایجوکیشن ڈاکٹر عالیہ شاہین ، سیکریٹری داخلہ ہارون احمد خان ، سیکریٹری جنرل ایڈمنسٹریشن ذوالفقار علی شاھ، سیکریٹری خزانہ ڈاکٹر نور عالم اور دیگر افسران نے شرکت کی۔

اجلاس میں فیصلہ کیا گیا کہ سیکریٹری داخلہ الیکشن کمیشن، سندھ پولیس اور ڈویزنل و ڈسٹرکٹ ایڈمنسٹریشن کے ساتھ روابط کو فروغ دے کر تمام انتخابات کے پرامن اور منصفانہ انعقاد کے لئے حکمت عملی کو فروغ دینگے۔

(جاری ہے)

سیکریٹری اسکول ایجوکیشن اور سیکریٹری امپلی مینشن پولنگ اسٹیشن سے متعلق ضروریات کی فراہمی کے لئے لائحہ عمل مستحکم کریں گے۔متعلقہ افسران کو ہدایت کی گئی کہ وہ محکمہ جاتی روابط کو فروغ دے کر عام انتخابات 2018 کے انعقاد کے سلسلے میں موثر اقدامات عمل میں لائیں۔

اور پولنگ اسٹیشنز پر حکومت سندھ کے متعلقہ عملہ کی تعناتی، پینے کے پانی ، بجلی اور دیگر سہولتوں کی فراہمی کو یقینی بنائیں۔صوبائی الیکشن کمشنر نے اجلاس کو آگاہ کیا کہ 25 جون 2018 کو پولنگ اسٹیشنز متعین کردیئے جائیں گے جن کی فہرست جاری کر دی جائے گی۔