عوامی مسلم لیگ کے سربراہ شیخ رشید احمد نے موٹر سائیکل پر اپنے حلقے میں انتخابی مہم کا آغاز کر دیا

اتوار 24 جون 2018 13:40

اسلام آباد ۔ (اُردو پوائنٹ اخبارتازہ ترین - اے پی پی۔ 24 جون2018ء) عوامی مسلم لیگ کے سربراہ شیخ رشید احمد نے موٹر سائیکل پر اپنے حلقے میں انتخابی مہم کا آغاز کر دیا ۔

(جاری ہے)

تفصیلات کے مطابق عوامی مسلم لیگ کے سربراہ اور این اے 60اور 62سے قومی اسمبلی کے انتخابات میں حصہ لینے والے شیخ رشید احمد نے آج اتوار کو انتخابی مہم کے سلسلے میں موٹر سائیکل پر سوار ہو کر اپنے حلقے میں مختلف علاقوں کا دورہ کیا اور لوگوں سے ووٹ مانگے ، انہوں نے کہاکہ اقتدار میں آکر نالہ لئی ایکسپریس وے اور غازی بروتھا کے منصوبے مکمل کروں گا اور چوروں ، ڈاکوئوں سے قومی دولت واپس لے کر قومی خزانے میں جمع کروائیں گے ۔

شیخ رشید نے کہا کہ وہ انتخابات میں دونوں حلقوں سے ریکارڈ ووٹ حاصل کریں گے اس موقع پر میڈیا سے گفتگو کرتے ہوئے شیخ رشید نے کہا کہ حالات جیسے بھی ہوں ہمیں انتخابات کی طرف بڑھنا ہے ۔ عوامی مسلم لیگ کے سربراہ شیخ رشید کا قومی اسمبلی کے حلقہ این اے 60سے مسلم لیگ ن کے امیدوار حنیف عباسی اور این اے 62سے ان کا مقابلہ مسلم لیگ ن کے بیرسٹر دانیال چوہدری سے ہوگا ۔ واضح رہے کہ شیخ رشید احمد کو پاکستان تحریک انصاف کی حمایت حاصل ہے کیونکہ پی ٹی آئی نے دونوں حلقوں میں اپنا امیدوار کھڑا نہیں کیا ہے ۔