بھارت میں سوئے ہوئے کتے پر سڑک بنا دی گئی

جانوروں کے حقوق کے کارکنوں کا احتجاج ، تعمیراتی کمپنی کی گاڑیاں ضبط کرلیں

اتوار جون 16:50

آگرہ (اُردو پوائنٹ اخبارتازہ ترین۔ 24 جون2018ء) بھارتی شہر آگرہ میں سڑک کی تعمیر کا کام کرنے والے مزدوروں نے کتے پر تارکول ڈال کر اس کے اوپر ہی سڑک بنا ڈالی،جانوروں کے حقوق کے کارکنوں نے زبردست احتجاج کرتے ہوئے تعمیراتی کمپنی کی گاڑیاں ضبط کرلیں۔ تفصیلات کے مطابق آگرہ میں تاج محل کے قریب سڑک کی تعمیر کا کام کرنے والے مزدوروں نے کنارے پر سوئے ہوئے کتے کو ہٹانے کی زحمت کیے بغیر اس کے اوپر گرم تارکول ڈال کر سڑک تعمیر کردی جس سے کتا موقع پر ہی ہلاک ہوگیا۔

(جاری ہے)

حکام نے سارا الزام نجی کمپنی پر رکھتے ہوئے کہا کہ سڑک کی تعمیر اور استر کاری کا کام کمپنی کا تھا۔اس واقعے پر جانوروں کے حقوق کے ادارے کے نگرانوں نے کہاہے کہ کتا اس وقت سو رہا تھا، اسے بھگانے کے بجائے اسی پر تارکول ڈالا گیا جس کی وجہ سے اس کا آدھا جسم سڑک میں ہی دب گیا۔جانوروں کے حقوق کے کارکنوں نے زبردست احتجاج کرتے ہوئے تعمیراتی کمپنی کی گاڑیاں ضبط کرلیں اور کام رکوا دیا۔ کمپنی کے اعلی عہدیدار کو جائے وقوعہ پر طلب کرلیا گیا۔ جس کے بعد مشینری کی مدد سے سڑک کو کھود کر کتے کی لاش نکالی گئی۔علاقہ پولیس کی جانب سے کام کرنے والی کمپنی کے خلاف مقدمہ درج کرلیا گیا ہے۔