جرمنی کے شہر ووپرٹال میں دھماکے سے ایک عمارت تباہ ہوگئی ،ْ پچیس افراد زخمی

اتوار 24 جون 2018 20:40

برلن(اُردو پوائنٹ اخبارتازہ ترین - این این آئی۔ 24 جون2018ء) جرمنی کے شہر ووپرٹال میں دھماکے سے ایک عمارت تباہ ہوگئی جس کے نتیجے میں 25 افراد زخمی ہوگئے۔بین الاقوامی میڈیا رپورٹس کے مطابق واقعہ مغربی شہر ووپرٹال میں پیش آیا جہاں ایک بلڈنگ زوردار دھماکے سے تباہ ہوگئی اور اس میں آگ بھڑک اٹھی۔اطلاع ملنے پر ریسکیو ادارے اور فائرفائٹرز نیموقع پر پہنچ کر اپارٹمنٹ کے ملبے میں دبے اور دیگر حصوں میں پھنسے 25 افراد کو نکال کر ہسپتال منتقل کردیا ۔

حکام کا کہنا ہے کہ زخمیوں میں 4 کی حالت تشویشناک ہے ۔

(جاری ہے)

فائرفائٹرز نے کئی گھنٹوں کی جدوجہد کے بعد آگ پر قابو پالیا اور امدادی کارروائیاں مکمل کرلی گئی ہیں۔پولیس نے جائے وقوعہ کو سیل کردیا اور کسی شخص کو اپارٹمنٹ کے قریب آنے کی اجازت نہیں دی جارہی۔ حکام نے دھماکے کی نوعیت سے متعلق فی الحال کچھ نہیں بتایا تاہم پولیس اور دیگر تفتیشی اداروں نے ابتدائی شواہد اکٹھے کرکے تحقیقات کا آغاز کردیا ہے۔ترجمان ووپرٹال پولیس کا کہنا ہے کہ واقعے میں کوئی شخص ہلاک نہیں ہوا اورسڑک پر گرنے والے عمارت کے ملبے کو ہٹایا جارہا ہے تاہم دھماکے کی نوعیت کے حوالے سے حتمی طور پر کچھ نہیں کہا جاسکتا۔