کراچی،شاہد آفریدی بھی پانی کے معاملے پر بول پڑے

حکومتیں آتی ہیں اور چلی جاتی ہیں کسی نے پانی کا مسئلہ حل نہیں کیا،کرکٹر

پیر جون 18:52

کراچی،شاہد آفریدی بھی پانی کے معاملے پر بول پڑے
کراچی (اُردو پوائنٹ اخبارتازہ ترین۔ 25 جون2018ء) پاکستان کرکٹ ٹیم کے سابق کپتان شاہد آفریدی نے بھی پاکستان کے معاشی حب کراچی میں پانی کے مسائل پر لب کشائی کرتے ہوئے اسے تشویش ناک قرار دے دیا۔سماجی رابطے کی ویب سائٹ ٹوئٹر پر اپنے ایک پیغام میں ریکارڈ ساز آل راؤنڈر شاہد آفریدی کا کہنا تھا کہ ملک میں حکومتیں آتی اور چلی جاتی ہیں لیکن پانی کا مسئلہ حل نہیں ہورہا۔

کراچی کی اہمیت اجاگر کرتے ہوئے شاہد آفریدی کا کہنا تھا کہ پاکستان کو وجود میں آئے ہوئے 70 برس ہوگئے لیکن پاکستان کے لیے شہ رگ کی حیثیت رکھنے والے کراچی شہر کے مسائل آج تک حل نہیں کیے جاسکے۔اپنے پیغام میں شاہد آفریدی نے مزید کہا کہ سمندر کے کنارے پر واقع ہونے کے باوجود کراچی کے مکین پینے کے پانی کی بوند بوند کو ترس رہے ہیں۔

(جاری ہے)

خیال رہے کہ کراچی میں پانی کا بحران شدید سے شدید تر ہوتا جارہا ہے اور شہر میں پانی کی قلت کی وجہ سے شہر میں احتجاج کا سلسلہ بھی شروع ہوگیا ہے۔

اس کے ساتھ ساتھ حب ڈیم میں پانی کی سطح خطرناک حد تک پہنچنے کے بعد کراچی اور حب شہر کو پانی کی فراہمی بند کیے جانے کا بھی امکان ہے۔واضح رہے کہ 9 جون کو قلتِ آب کے حوالے سے سماعت کے دوران چیف جسٹس میاں ثاقب نثار نے ریمارکس دیے تھے کہ ’ہم نے پانی کی قلت کے خاتمے کا تہیہ کر لیا ہے، اب سپریم کورٹ ڈیمز بنانے سے متعلق آگے بڑھے گی اور کردار ادا کرے گی‘۔