جیمز میٹس شمالی کوریا سے امریکی فوجیوں کی باقیات واپس ملنے کے حوالے سے پٴْر امید

منگل جون 11:20

واشنگٹن ۔ (اُردو پوائنٹ اخبارتازہ ترین۔ 26 جون2018ء) امریکی وزیر دفاع جیمز میٹس نے اس امید کا اظہار کیا ہے کہ شمالی کوریا کی جانب سے کوریا کی جنگ کے دوران مارے گئے امریکی فوجیوں کی باقیات جلد ان کے حوالے کر دی جائیں گی ،عالمی ذرائع ابلاغ کے مطابق امریکی وزیر دفاع نے اپنے ایک بیان میںکہا کہ شمالی کوریا کے سربراہ کم جونگ اٴْن نے 12 جون کو امریکی صدر ڈونلڈ ٹرمپ کے ساتھ ملاقات میں اس امر کا عہد کیا تھا۔

جیمزمیٹس کے مطابق جنوبی کوریا میں اقوام متحدہ کی فورسز ان باقیات کو وصول کرنے کے لئے تیار ہیں۔ امریکی وزیر کا کہنا تھا کہ ہم اس حوالے سے پٴْر امید ہیں کہ حوالگی کا عمل شروع ہو جائے گا۔سنگاپور معاہدے کی چوتھی شِق کے مطابق امریکا اور شمالی کوریا نے اس بات کا عہد کیا کہ وہ جنگی قیدیوں اور جنگ میں مارے جانے والے فوجیوں کی باقیات حاصل کریں گے اور جن لوگوں کی شناخت ہو چکی ہے انہیں فی الحال ان کے ملکوں کو واپس کیا جائے۔

(جاری ہے)

چند روز قبل امریکی محکمہ دفاع نے پینٹاگون نے کوریا کی جنگ میں لاپتہ ہونے والوں کے حوالے سے ایک یادداشت جاری کی تھی جس میں بتایا گیا کہ شمالی کوریا کے حکام کا کہنا ہے کہ ان کو گزرے سالوں کے دوران 200 افراد کی باقیات ملی ہیں۔واضح رہے کہ کوریا کی جنگ کے دوران جزیرہ نما کوریا میں 35 ہزار سے زیادہ امریکی فوجی مارے گئے تھے۔ پینٹاگون کے مطابق مذکورہ فوجیوں میں 7700 ابھی تک لاپتہ شمار کیے جاتے ہیں جن میں 5300 شمالی کوریا میں لاپتہ ہیں۔