ایپلٹ ٹریبونل نے خواجہ آصف اور فردوس عاشق کو الیکشن لڑنے کی اجازت دیدی

فردوس عاشق اعوان این اے 72 اور خواجہ آصف این اے 73 سیالکوٹ سے انتخاب لڑ رہے ہیں

منگل 26 جون 2018 15:23

ایپلٹ ٹریبونل نے خواجہ آصف اور فردوس عاشق کو الیکشن لڑنے کی اجازت ..

لاہور (اُردو پوائنٹ اخبارتازہ ترین - آن لائن۔ 26 جون2018ء) لاہور ہائیکورٹ کے ایپلٹ ٹریبونل نے مسلم لیگ (ن) کے رہنما خواجہ آصف اور تحریک انصاف کی امیدوار فردوس عاشق اعوان کے کاغذات نامزدگی منظوری کے خلاف درخواستیں مسترد کردیں اور انہیں الیکشن لڑنے کی اجازت دے دی۔ ایپلٹ ٹریبونل نے سیالکوٹ کے حلقہ این اے 73 سے (ن) لیگی امیدوار خواجہ آصف کے خلاف دائر درخواست ناقابل سماعت قرار دیتے ہوئے مسترد کردی۔

ٹریبونل نے فریقین کے وکلا کے دلائل سننے کے بعد گزشتہ روز محفوظ کیا گیا فیصلہ جاری کر دیا جس میں خواجہ آصف کو الیکشن لڑنے کی اجازت دی گئی ہے۔یاد رہے کہ قومی اسمبلی کی نشست این اے 73 سیالکوٹ ٹو پر خواجہ آصف کا مقابلہ تحریک انصاف کے امیدوار عثمان ڈار سے ہوگا۔ہائیکورٹ کے ایپلٹ ٹریبونل نے تحریک انصاف کی امیدوار فردوس عاشق اعوان کے کاغذات نامزدگی کی منظوری کے خلاف بھی اپیل مسترد کردی۔

(جاری ہے)

جسٹس سید شہباز رضوی نے این اے 72 سیالکوٹ ون سے ووٹر زید لطیف کی اپیل پر فیصلہ سناتے ہوئے قرار دیا کہ ریٹرننگ افسر نے پی ٹی آئی امیدوار کے کاغذات نامزدگی قانون کے مطابق منظور کیے۔درخواست گزار کا مؤقف تھا کہ فردوس عاشق اعوان نے کاغذات نامزدگی میں شادی اور بچوں کاخانہ پٴْر نہیں کیا اس لیے ان کے نامزدگی فارم مسترد کیے جائیں۔