انتخابات میں عوام چوروں ، لیٹروں اور کرپٹ مافیا کے فریب میں نہ آئیں ‘ذکر اللہ مجاہد

قوم نے ایم ایم اے کی ایماندار قیادت کا ساتھ دیا تو اُنھیں اسلامی اور خوشحال پاکستان دیں گے‘صدر متحدہ مجلس عمل و امیر جماعت اسلامی لاہور

منگل 26 جون 2018 18:23

لاہور (اُردو پوائنٹ اخبارتازہ ترین - این این آئی۔ 26 جون2018ء) صدر متحدہ مجلس عمل و امیر جماعت اسلامی لاہور ذکر اللہ مجاہد نے کہا ہے کہ انتخابات میں امیدواران کا میرٹ کی بنیاد پر ایوانوں میں نہ پہنچنا ہی لوٹ مار کی سیاست کو پروان چڑھاتاہی2018 ء کے الیکشن میں عوام آزمائے ہوئے چوروں ، لیٹروں اور کرپٹ مافیاکے فریب میں نہ آئیں ۔ ان خیالات کا اظہار گذشتہ روز انہوں نے پی پی 151میں کارنرمیٹنگ میں اہل علاقہ سے خطاب کرتے ہوئے کیا۔

انہوں نے مزید کہا کہ قومی دولت لوٹ کر بیروں ملک بینکوں میں جمع کرنے والے ساستدان قومی مجرم ہیں ، انھیں اقتدار کے ایوانوں میں نہیں بلکہ جیلوں میں ہونا چاہیے اور وہ وقت دور نہیں جب متحدہ مجلس عمل ان لیٹروں سے قوم کی ایک ایک پائی وصول کر کے اسے عام آدمی کی فلاح و بہود پر خرچ کرے گی ۔

(جاری ہے)

انہوں نے کہا کہ اس وقت ملک کے اندر سیکولرازم کا پرچار کرنے والے سیاسی مداری لسانی ، صوبائی اور عصبیتوں کے دلفریب نعرے لگا کر اپنے ناپاک مقاصد حاصل کرنے کے لیے پاکستانی عوام میں نفرت کے بیج بو رہے ہیں جنہیں متحدہ مجلس عمل کبھی پورا نہیں ہونے دے گی ۔

ذکر اللہ مجاہد نے کہاکہ جھنڈے ،پارٹیاں اور وفاداریاں بدلنے والوں کو عوام الیکشن میں مسترد کرتے ہوئے کتاب کے نشان پر ایم ایم اے کے ایماندار اور کرپشن سے پاک امیدواران کو اپنے ووٹ کی طاقت سے کامیاب کریں۔