اسلام آباد کی دیہی آبادی بلوچستان کے دیہی علاقوں سے زیادہ بدتر ہے جسکی ترقی کے لئے جامع حکمت عملی کی ضرورت ہے، ڈاکٹر غضنفر مہدی

منگل 26 جون 2018 23:00

اسلام آباد(اُردو پوائنٹ اخبارتازہ ترین - آئی این پی۔ 26 جون2018ء) ممتاز سکالر اور NA-53کے آزاد امیدوار ڈاکٹر غضنفر مہدی نے کہا ہے کہ اسلام آباد کے دیہی علاقے بلوچستان کے دیہی علاقوں سے زیادہ بد تر ہیں ۔اسلام آباد کی ترقی کے لئے ایک جامع حکمت عملی کی ضرورت ہے ۔انہوں نے یہ بات اپنی انتخابی مہم کے دوران تلہاڑ کے لوگوں سے خطاب کرتے ہوئے کہی۔

(جاری ہے)

انہوں نے کہاکہ اسلام آباد دنیا بھر کا خوبصورت عظیم دارلخلافہ ہے اگر گزشتہ حکومتیں چاہتیں تو یہاں سیاحت کی ترقی سے اقتصادی خوشحالی رونما ہوتی۔ ڈاکٹر مہدی نے کہا کہ دنیا بھر کے تمام ممالک میں دارلحکومت کو صوبائی درجہ حاصل ہوتا ہے لیکن بدنصیبی سے اسلام آباد کی دیہی آبادی کی حالت زار بلوچستان اور فاٹا کے دیہی علاقوں کا منظر پیش کرتی ہے ۔ انہوں نے کہا کہ موجودہ انتخابات میں سیاسی جماعتوں کے لوگ بدترین شکست کھائیں گے اور آذاد امید واروں کی اچھی بڑی تعداد کامیاب ہوگی۔