سپریم کورٹ نے نیب کو ملک ریاض اور ان کے اہل خانہ کے خلاف کارروائی سے روک دیا

ملک ریاض 15 دنوں میں 5 ارب روپے جمع کروائیں گے‘ بحریہ ٹاﺅن کے تمام مقدمات سے متعلق معاملات حل ہونے تک رقم رہے گی۔سپریم کورٹ

Mian Nadeem میاں محمد ندیم بدھ 27 جون 2018 14:18

سپریم کورٹ نے نیب کو ملک ریاض اور ان کے اہل خانہ کے خلاف کارروائی سے ..
اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔27 جون۔2018ء) سپریم کورٹ نے بحریہ ٹاﺅن نظرثانی کیس میں ملک ریاض کی جانب سے تحریری جواب جمع کرانے کے بعد قومی احتساب بیورو ( نیب ) کو ملک ریاض اور ان کے اہل خانہ کے خلاف کارروائی سے روک دیا، ساتھ ہی عدالت نے بحریہ ٹاﺅن کو سرمایہ کاروں سے رقم وصول کرنے کی اجازت دے دی۔سپریم کورٹ میں چیف جسٹس میاں ثاقب نثار کی سربراہی میں بحریہ ٹاﺅن نظر ثانی کیس کی سماعت ہوئی، اس دوران بحریہ ٹاﺅن کے سربراہ ملک ریاض عدالت میں پیش ہوئے اور تحریری جواب جمع کرایا۔

جواب میں کہا گیا کہ ملک ریاض 15 دنوں میں 5 ارب روپے جمع کروائیں گے اور بحریہ ٹاﺅن کے تمام مقدمات سے متعلق معاملات حل ہونے تک رقم رہے گی۔اس دوران چیف جسٹس نے ریمارکس دیے کہ ملک ریاض یا ان کے اہل خانہ کی تمام جائیدادیں قرق ( ضبط ) کریں گے۔

(جاری ہے)

چیف جسٹس نے ریمارکس دیے کہ کل کی ساری عدالتی کارروائی میڈیا نے بلیک آﺅٹ کردی، کیا آپ کا اتنا اثر و رسوخ ہے؟ کیا آپ نے پیسے تو نہیں لگا دیے؟ ملک ریاض آپ کے ساتھ ناانصافی نہیں ہوگی۔

اس پر ملک ریاض نے کہا کہ ہر چیز میرے نام نہ لگائی جائے، پورے میڈیا میں مجھے ڈان بنا دیا گیا، جس پر چیف جسٹس نے کہا کہ کیا آپ حکومتیں بنانے اور گرانے میں ڈان نہیں بنے رہے؟جس پر ملک ریاض نے کہا کہ میں نے کیا گناہ کیا ہے، اس پر چیف جسٹس نے ملک ریاض کو مخاطب کرتے ہوئے ریمارکس دیے کہ حکومتیں بنانے اور گرانے کا کام چھوڑ دیں، ملک ریاض وہ وقت نہیں رہا، جب آپ کے لیے اگلے ہی دن حکومتیں تبدیل ہوجاتی تھیں۔

دوران سماعت چیف جسٹس نے کہا کہ اپنے اخراجات کے لیے جتنے پیسے چاہئیں وہ رکھ لیں، ہمیں بتائیں سینیٹ انتخابات میں آپ نے کیا کیا؟چیف جسٹس نے ریمارکس دیے کہ ہمیں معلوم ہے کہ آپ نے سینیٹ انتخابات میں کیا کردار ادا کیا، آپ بس رہنے دیں۔اس دوران چیف جسٹس نے مکالمہ کیا کہ ملک ریاض میں بحریہ ٹاﺅن کراچی کا دورہ کرنے کے لیے آرہا ہوں، میں نے حساب کتاب کرکے ایک ایک روپیہ واپس کروانا ہے۔

چیف جسٹس نے کہا کہ اگر ملک ریاض کو جیل بھیج دیا تو جہاں کرین کھڑی ہے وہیں کھڑی رہے گی۔بعد ازاں عدالت نے ملک ریاض کی جانب سے جمع کرائے گئے جواب پر کہا کہ ملک ریاض نے تحریری تجاویز عدالت میں جمع کراوائیں، جس میں کہا گیا کہ ملک ریاض 5 ارب روپے 15 دنوں میں جمع کروائیں گے۔عدالت نے اپنے حکم میں کہا کہ ملک ریاض کے جواب میں ان کے اہل خانہ کے نام لکھے ہیں، عدالت انہیں قرق کرنے کا حکم دیتی ہے۔

عدالت نے کہا کہ بحریہ ٹاﺅن کی جانب سے تجاویز دی گئی جبکہ ملک ریاض نے 5 ارب روپے عدالت میں جمع کرنے پر رضا مندی ظاہر کی ہے۔عدالت کی جانب سے کہا گیا کہ 5 ارب روپے سپریم کورٹ کے اکاﺅنٹ میں جمع ہوں گے۔سپریم کورٹ نے کہا کہ دوسری تجویز میں بحریہ ٹاﺅن نے کہا ہے کہ وہ اپنی ذاتی جائیداد نہیں بیچیں گے، ملک ریاض کے خاندان کی ذاتی جائیدادیں ضمانت کے طور پر عدالت میں منسلک کی جائیں گی۔

عدالتی حکم میں کہا گیا کہ ملک ریاض رقم کا 20 فیصد سپریم کورٹ کے بینک اکاﺅنٹ میں جمع کرائیں گے اور اس حوالے سے سپریم کورٹ میں علیحدہ اکاﺅنٹ کھولا جائے گا۔عدالت کی جانب سے کہا گیا کہ نیب بحریہ ٹاﺅن کے خلاف اس وقت تک کارروائی نہ کرے جب تک نظر ثانی کیس کا فیصلہ نہیں ہوتا۔سپریم کورٹ نے کہا کہ بحریہ ٹاﺅن کیس کا فیصلہ دینے والے ایک جج ریٹائرڈ ہوگئے اور ایک نے ملک ریاض کے حق میں اختلاف کیا، اس لیے نظرثانی کیس میں 5 رکنی لاجر بینچ تشکیل دیا جائے گا۔

خیال رہے کہ گزشتہ روز سپریم کورٹ نے بحریہ ٹاﺅن کراچی کی جانب سے زمین خریدنے والوں سے رقم وصول کرنے کو عدالتی احکامات کی خلاف ورزی قرار دیتے ہوئے رقم وصول کرنے سے روک دیا تھا۔اس کے ساتھ ساتھ چیف جسٹس میاں ثاقب نثار نے بحریہ ٹاﺅن کے سربراہ ملک ریاض کو 2 ہفتوں میں 5 ارب روپے اور ذاتی جائیداد کے کاغذات بطور ضمانت جمع کرانے کا حکم دیا تھا جبکہ عدالت نے ملک ریاض سے 2 ہفتوں میں 5 ارب روپے اور ذاتی جائیداد کے کاغذات بطور ضمانت طلب کرلیے۔
سپریم کورٹ نے نیب کو ملک ریاض اور ان کے اہل خانہ کے خلاف کارروائی سے ..