منشیات کی لعنت سے نجات کیلئے اجتماعی کوششوں کی ضرورت ہے،ایڈیشنل ڈپٹی کمشنر

بدھ جون 15:56

فیصل آباد۔27 جون(اُردو پوائنٹ اخبارتازہ ترین۔ 27 جون2018ء) انسداد منشیات کے عالمی دن کے موقع پرمحکمہ ایکسائزاینڈ ٹیکسیشن اور انجمن انسداد منشیات ڈسٹرکٹ ہیڈ کوارٹرز ہسپتال کے اشتراک سے آگاہی واک کا انعقاد کیا گیا جس کی قیادت ایڈیشنل ڈپٹی کمشنر جنرل خالد مسعود فروکہ اور ایکسائز آفیسر رانا خالد نے کی جبکہ جنرل سیکرٹری انجمن انسداد منشیات محمد انوار خاں،سوشل ویلفیئر آفیسر صوفیہ رضوان،میڈیکل سوشل آفیسر رابعہ،اسسٹنٹ ایکسائز آفیسرز رانا احمد حسن،عبدالستار اعوان،چوہدری غلام رسول،انسپکٹرز ایکسائز رانا فیصل،ضرار احمد کے علاوہ طالب علم،این جی اوز کے نمائندے اور سول سوسائٹی کے افراد بھی واک میں شریک تھے۔

واک ضلع کونسل چوک سے شروع ہو کر خلیق قریشی روڈ سے ہوتی ہوئی کچہری بازار چوک پہنچ کر اختتام پذیر ہوئی۔

(جاری ہے)

واک کے شرکاء نے نشہ سے انکار،زندگی سے پیار،نشہ کے نقصانات اور دیگر تحریروں پر مشتمل بینرز اور پلے کارڈز اٹھا رکھے تھے۔واک کے اختتام پر اظہار خیال کرتے ہوئے ایڈیشنل ڈپٹی کمشنر جنرل نے کہا کہ نشہ انسان کو انسانیت کی رفعتوں سے تنزلی کے گڑھوں میں دھکیل دیتا ہے لہذا معاشرے کو نشہ سے انکاراور زندگی سے پیار کا سبق ذہن نشین کرانے کے لئے آگاہی پروگرامز کاانعقاد ناگزیر ہے۔

انہوں نے کہا کہ منشیات کے خلاف عالمی دن منانے کا مقصد اس برائی کے خلاف جہاد کے عزم کی تجدید کرنا ہے تاکہ نشہ کے خلاف نفرت کو اجاگر کرکے اس کے استعمال پرقابو پایا جاسکے۔انہوں نے کہا کہ ضلعی انسداد منشیات کمیٹی کے زیراہتمام آگاہی پروگرامز کے انعقاد کا سلسلہ بھی جاری ہے تاہم اس لعنت سے نجات کے لئے اجتماعی کوششوں کی ضرورت ہے اور اس ضمن میں این جی اوز کا کردار قابل ستائش ہے۔

ایکسائز اینڈ ٹیکسیشن آفیسر نے کہا کہ نشہ نوجوان نسل کو گھن کی طرح چاٹ رہا ہے اور اس وجہ سے نشہ بازوں کی انفرادی وخاندانی زندگیوں کو نقصان کے ساتھ ساتھ مجموعی طور پر قوم بھی متاثر ہوتی ہے لہذااس عفریت سے چھٹکارہ پانے کے لئے معاشرے کے ہرطبقے کو آگے آناچاہیے۔انہوں نے منشیات فروشوں کے خلاف محکمہ ایکسائز کی کارکردگی سے بھی آگاہ کیا۔

جنرل سیکرٹری انجمن انسداد منشیات نے کہا کہ نشہ کے رحجان کو روکنے کے لئے سماجی سطح پر مربوط کوششوں کی ضرورت ہے تاکہ نوجوانوں کی نشہ آور اشیاء تک رسائی ممکن نہ ہو اور وہ اس خطرناک اور بھیانک فعل سے بچ سکیں۔انہوں نے کہا کہ نشہ کے خلاف جنگ بھرپور عزم کے ساتھ جاری رہے گی۔انہوںنے انجمن انسداد منشیات کے نشہ کے خلاف اقدامات پر بھی روشنی ڈالی۔دیگر مقررین نے کہا کہ منشیات فروشوں کے خلاف جنگی بنیادوں پر اعلان جنگ کرنے کی ضرورت ہے جبکہ عوامی آگاہی کے لئے واکس،سیمینار اور دیگر پروگرامز تسلسل کے ساتھ جاری رہنے چاہیئیں۔