لیسکو کا عملہ صارفین کی شکایات کے فوری ازالے کو یقینی بنائے۔ چیف ایگزیکٹو مجاہد پرویز چٹھہ

لاہور۔27 جون(اُردو پوائنٹ اخبارتازہ ترین - اے پی پی۔ 27 جون2018ء) چیف ایگزیکٹو لیسکو مجاہد پرویز چٹھہ نے لاہور سمیت لیسکو ریجن میں بارشوں کی پیشنگوئی کے پیشِ نظر لیسکو کے عملے کو ہمہ وقت الرٹ رہنے کی ہدایات جاری کرتے ہوئے کہا ہے کہ لیسکو کا عملہ صارفین کی شکایات کے فوری ازالے کو ہر صورت یقینی بنائے ۔انہوں نے شہریوں سے کہا ہے کہ بارشوں کے دوران حفاظتی تدابیر اپنائیں کیونکہ ذرا سی بے احتیاطی کسی بڑے نقصان یا حادثے کا بھی سبب بن سکتی ہے ۔

لیسکو کے ترجمان کی جانب سے جاری ہونے والے اعلامیئے کے مطابق لاہور اور گردونواح میں گزشتہ رات آنے والی طوفانی بارش کے باعث متاثر ہونے والے تمام فیڈرز سے بجلی کی سپلائی بحال کردی گئی ہے۔لیسکو ترجمان کے مطابق گزشتہ رات کے طوفان اور اس کے بعد ہونے والی شدید بارش کے نتیجے میں لیسکو کے 350فیڈرز ٹرپ ہوئے تھے جس کے بعد لیسکو کے چیف ایگزیکٹو مجاہد پرویز چٹھہ کی خصوصی ہدایت پر فیلڈا سٹاف فوری طور پر حرکت میں آیا اور رات ہی 347 متاثرہ فیڈرز سے بجلی کی سپلائی دوبارہ بحال کر دی۔

(جاری ہے)

جبکہ بقایا 3فیڈرز کے سپلائی علی الصبح بحال کردی گئی۔ مرکزی سسٹم کو مکمل طور پر بحال کرنے کے بعد اکا دکا علاقوں میں بجلی سے متعلق انفرادی شکایات کے سلسلے میں لیسکو کا فیلڈا سٹاف پوری طرح سے متحرک ہے اور کسی بھی قسم کی شکایت کا فی الفور ازالہ کیا جا رہا ہے۔چیف ایگزیکٹو مجاہد پرویز چٹھہ کا کہنا ہے کہ لیسکو کے آپریشنل اسٹاف نے سخت موسم کے باوجود بھی انتہائی محنت کے ساتھ تمام متاثرہ علاقوں میں بجلی کی سپلائی کو بحال کیا۔

ترجمان کے مطابق شدید بارش اور طوفان کے باوجود بھی لیسکو کا عملہ پوری طرح سے الرٹ رہاجبکہ لیسکو کے چیف ایگزیکٹو مجاہد پرویز چٹھہ ،جی ایم آپریشن چوہدری محمد انور اور آپریشن سے متعلقہ افسران نے بجلی بحالی کے کاموں کی خود مانیٹرنگ کی۔چیف ایگزیکٹو مجاہد پرویز چٹھہ نے تمام فیلڈا سٹاف کی کارکردگی کو بھی سراہا ہے اور کہا ہے کہ لیسکو کا آپریشنل اسٹاف ہنگامی صورتحال سے نبردآزما ہونے اور اس سے نمٹنے کی بھر پور صلاحیت رکھتا ہے اور ساتھ ہی ساتھ صارفین کی جانب سے تعاون پر ان کا شکریہ بھی ادا کیا ہے۔