عام انتخابات میں حصہ لینے والے امیدواروں کے کاغذات نامزدگی منظور یا مسترد کئے جانے کے خلاف اپیلوں کی سماعت کا عمل مکمل ہو گیا

بدھ 27 جون 2018 22:58

اسلام آباد ۔ (اُردو پوائنٹ اخبارتازہ ترین - اے پی پی۔ 27 جون2018ء) آئندہ عام انتخابات میں حصہ لینے والے امیدواروں کے کاغذات نامزدگی ریٹرننگ آفیسران کی جانب سے منظور یا مسترد کئے جانے کے خلاف اپیلوں کی سماعت کا عمل مکمل ہو گیا، سابق وزیراعظم شاہد خاقان عباسی کے آبائی حلقہ این اے 57 مری سے کاغذات نامزدگی مسترد کر دیئے گئے، تحریک انصاف کے ترجمان فواد چوہدری، چکوال سے سردار غلام عباس کے کاغذات نامزدگی بھی مسترد کر دیئے گئے، امیدواروں کی نظرثانی شدہ فہرست (آج) جمعرات کو جاری کی جائے گی۔

الیکشن کمیشن کی جانب سے جاری انتخابی شیڈول کے مطابق ریٹرننگ آفیسران کی جانب سے آئندہ عام انتخابات میں حصہ لینے والے امیدواروں کے کاغذات نامزدگی منظور یا مسترد کئے جانے کے خلاف اپیلیں بدھ کو اپیلٹ ٹربیونلز کی جانب سے نمٹا دی گئی۔

(جاری ہے)

تحریک انصاف کے سربراہ عمران خان کو این اے 53 اسلام آباد اور بنوں سے انتخابات میں حصہ لینے کی اجازت دیدی گئی۔ امیدواروں کی نظرثانی شدہ فہرست (آج) جمعرات کو جاری کی جائے گی جبکہ کاغذات نامزدگی 29 جون کو واپس لئے جا سکیں گے، اسی روز امیدواروں کی حتمی فہرست شائع ہو گی جبکہ 30 جون کو امیدواروں کو انتخابی نشانات الاٹ کئے جائیں گے۔ قومی اور چاروں صوبائی اسمبلیوں کیلئے پولنگ 25 جولائی کو ہو گی۔