الیکشن کمیشن نے (ن) لیگ کی رجسٹریشن کیخلاف درخواست پر نوازشریف کو نو جولائی طلب کرلیا

نا اہل شخص کے نام پارٹی نہیں رہ سکتی، یہ آئین اورقانون کے خلاف ہے، نوازشریف کے نام سے پارٹی رجسٹرڈ نہیں ہونی چاہیے ،ْدرخواست گزار

جمعہ 29 جون 2018 13:22

الیکشن کمیشن نے (ن) لیگ کی رجسٹریشن کیخلاف درخواست پر نوازشریف کو نو ..

اسلام آباد(اُردو پوائنٹ اخبارتازہ ترین - این این آئی۔ 29 جون2018ء) الیکشن کمیشن نے مسلم لیگ (ن) کی رجسٹریشن کے خلاف درخواست پرپارٹی کے تاحیات قائد نوازشریف کو نو جولائی طلب کرلیا ہے۔جمعہ کو الیکشن کمیشن میں مسلم لیگ (ن) کی رجسٹریشن کے خلاف درخواست کی سماعت کی۔

(جاری ہے)

درخواست عوامی تحریک کے نیازانقلابی نے دائرکی جس میں موقف اختیارکیا گیا کہ نواز شریف کو سپریم کورٹ نے نا اہل کیا ہے اورنا اہل شخص کے نام پارٹی نہیں رہ سکتی، یہ آئین اورقانون کے خلاف ہے، نوازشریف کے نام سے پارٹی رجسٹرڈ نہیں ہونی چاہیے، الیکشن کمیشن اس حوالے سے سپریم کورٹ کے 28 جولائی 2017 کے فیصلے کی روشنی میں کارروائی کرے۔

الیکشن کمیشن نے مسلم لیگ (ن) کی رجسٹریشن منسوخ کرنے کی درخواست پر نواز شریف کو نوٹس جاری کرتے ہوئے انہیں 9 جولائی کو طلب کرلیا۔واضح رہے کہ سپریم کورٹ نے گزشتہ برس نواز شریف کو نااہل قراردیا تھا جس کے بعد مسلم لیگ (ن) نے پارلیمنٹ میں عددی اکثریت کی بنیاد پرآئین میں ترمیم کرکے نوازشریف کودوبارہ پارٹی کا صدرمنتخب کرالیا تھا تاہم عدالت کی جانب سے ایک فیصلے میں اس آئنی ترمیم کو کالعدم قراردے دیا گیا تھا جس کے بعد نواز شریف کو پارٹی کا تاحیات قائد منتخب کیا گیا تھا۔